Домашен
"ЗА НЕД ДО" на "Светски фестивал на боречките вештини" во Грција
Академијата за боречки вештини “ЗА НЕД ДО” од Битола на покана на Грчката федерација за боречки вештини и градоначалникот на општина Сер во периодот од 21 – 22 мај 2016 ќе земе учество на 10-тиот “Светски фестивал на боречките вештини ” каде за прв пат ќе настапи и тим кој ќе ја претставува Република Македонија.
Македонскиот тим е составен од 36 натпреварувачи кои е предвидено да се натпреваруваат или демонстрираат во над 50 дисциплини, додека македонската делегација брои вкупно 56 члена, меѓу кои се официјални претставници на Академијата како и родители на натпреварувачи.„Ова е мошне интересна манифестација која веќе 10 години се организира низ светот. Оваа година е јубилеен 10 пат и на големо изненадување добивме покана токму од нашите колеги од соседна Република Грција, со цел да ја претставиме нашата држава,. “Светскиот фестивал на боречките вештини” прво има промотивен карактер, самиот назив тоа го констатира, но во се останато тоа е меѓународен настан со учество од над 30 држави и тука е чист професионализам и класични борби и демонстрации на самоодбрана”, изјави Златко Неделковски – шеф на македонската делегација.Годинава оваа манифестација е во соработка меѓу Грчката федерација за боречки вештини и градоначалникот на општина Сер и тоа не е случајност, имено во Сер е сместен најголемиот факултет за физичка култура и спорт во Република Грција, единка од Солунскиот Универзитет “Аристотел”.„Имавме помал рок за подготовки бидејќи оваа покана од нашите колеги од Грција не изненади. Ние само што го завршивме традиционалниот годишен изборен турнир, после кој се врши селекција на најдобрите за меѓународни натпревари. Но ние сме постојано подготвени и на поканата и на колегите и на градоначалникот на Сер за оваа манифестација која пред се има племенита цел за промоција на боречките вештини одговоривме со најверојатно еден од поголемите национални состави кои ќе преставуваат една од 30-тината држави таму. Ние сме подготвени”, изјави Дијана Неделковска – главен тренер на македонскиот тим и носител на титулата трократен светски шампион во екстремна самоодбрана за 2013, 2014 и 2015 година.Македонскиот тим за Сер отпатува на 20 мај со радост што ќе имаат можност да учествуваат на ваков вид манифестација која ги промовира разликите кои се богатство во боречките вештини но и професионална подготвеност. Од Сер – Република Грција да се обидат да постигнат успех со кој достојно ќе се претстави и Битола и Македонија.„Беше интернет хит кога 2013 година на сред Атина на Светското првенство се вееше 4 пати македонското знаме и се интонираша македонската химна за 4 злата кои нашиот тим и ги донесе на Македонија. Не сме од оние кои ветуваат или имаат таков вид на очекувања. Битно е борбите и демонстрациите да бидат совршено изведени и презентирани, а секој успех е само резултат на квалитетот. Кој знае, можеби и во Сер ќе се интонира нашата химна и ќе се вее македонското знаме”, изјави Дијана Неделковска. крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.