Домашен
ЖРК Вардар против Ѓер ја отвора сезоната во ЛШ
Да се направи чекор напред во однос на изминатите две сезони, односно пласман во финалето и борба за европскиот трон, е желбата на ракометарките на Вардар пред стартот на новата сезона во Лигата на шампионките.
’Вардарки’ новата сезона во елитното натпреварување ќе ја отворат во сабота против двократниот европски првак Ѓер. Мината сезона ЖРК Вардар токму против унгарскиот тим стигна до завршниот турнир, но во однос на тие натпревари Ѓер сега има далеку посилен состав.
„Амбициите на тимот остануваат исти, а тоа е пласман во самиот европски ракометен врв. Ова е трета сезона за нас во ЛШ и се надевам дека ќе биде среќна, да играме во едно европско финале и, зошто и да не ја освоме ЛШ. Кога како дебитанти успеавме да се пласираме на завршниот турнир, нема причина да не верувам дека оваа сезона можеме да направиме и нешто повеќе“, рече на прес-конференцијата претседателката на Вардар, Гордана Нацева.
Дуелот против унгарската екипа ќе биде првиот официјален меч за ракометарките на Вардар уште од почетокот на мај, кога играа на завршниот турнир во ЛШ. Според стручниот штаб, немањето квалитетни натпревари е најголемиот проблем за овој тим на Вардар.
„Мислам дека Ѓер е екипа за респрект, но не треба да претеруваме, сепак тие доаѓаат кај нас. Ѓер се засили во пресрет на сезоната со неколку квалитетни ракометарки, дојде Томори од ФТЦ, Грот е многу квалитетен среден бек, пикер од Холандија која претходно настапуваше во Франција. Можеби мал проблем ќе ни преставува што ова е прв натпревар од официјален карактер. Се надевам дека девојките ќе го одработат онака како што треба и онака како што се договараме“, изјави Индира Кастратовиќ, која дополни дека е задоволна од начинот на кој новите ракометарки се вклопиле во екипата.
„Имаме силен противник веќе на стартот во ЛШ. Ѓер е многу посилен него минатата сезона, во тимот им се вратија Горбиц и Аморим. Ние со нетрпение го очекуваме натпреварот, очекувам со помош од навивачите да забележиме победа која многу ќе ни значи во продолжение на сезоната. Ѓер е можеби во предност, бидејќи тие веќе играат натпревари во нивното првенство, играат во ритамот среда-недела“, рече десното крило Јованка Радичевиќ.
Натпреварот помеѓу ЖРК Вардар и Жер ќе се одигра в сабота од 20:15 часот во СЦ „Јане Сандански“./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.