Спорт
Ексклузивно интервју со Калин Ивановски: Верувам дека в недела можам да го освојам Вимблдон
Од Лондон, Ненад Живановски
Калин Ивановски, осумнаесетгодишниот русокос скопјанец, веќе втора година по ред како единствен ја претставува Македонија на најпрестижниот тениски турнир во светот, Вимблдон. И тоа добро го прави. Минатата година стигна до осминафиналето во јуниорска конкуренција, а денеска тој успех го надмина со пласман во четврт-финалето. Меѓутоа, оваа година амбициите му се многу поголеми – сака да одигра што повеќе мечеви, па и да заигра во неделното финале.
„Се чувствувам самоуверено, имам самодоверба и кој и да ми дојде до финалето, верувам дека ќе можам да го победам со мојата игра, која се темели на сигурни сервиси, бекхенди и форхенди. Мислам дека ги имам сите удари и можам да победам било кого до неделното финале. Единствен противник можам да бидам сам на себе и тоа да ме спречи да го остварам зацртаното. Сепак, верувам дека оваа година можам да го освојам Вимблдон во јуниорска конкуренција“.
На патот до финалето, на Калин му претстојат уште два меча. Утрешниот противник во четфртфиналето му е Шпанецот Педро Роденас, добар познаник на нашиот репрезентативец.
„Пред два дена тренирав со него. Знае да игра, има опасен сервис, не можеш да го читаш толку лесно… Згора на тоа е и левучар и има рамен бекхенд, што на тревнат терен знае да биде незгодно бидејќи топчето не отскокнува како на другите подлоги“.
За претходните мечеви на турнирот, кои за гледачите изгледаа дека релативно лесно ги добива, Калин ги објаснува на следниот начин:
„Првиот меч кога играв против домашниот претставник Лука Поу, вообичаено имав трема, затоа што е прв настап, додека се снајдеш ти треба време да се загрееш. Изгубив сет и гем и дури тогаш се смирив и најдов решение со поагресивна игра да продолжам да играм. Третиот сет веќе играв моја игра, опуштено и го добив последниот сет со 6-2. Во второто коло, против Мексиканецот Родриго Мендес, кој иако е 11-ти носител, влегов како фаворит, а така покажа и резултатот, 6-1 и 6-2. Денеска играв против осмиот носител, Литванецот Едас Бутвилис, кој има доста добри резултати оваа година, стигна до осминафинале на Австралија Опен и трето коло на Ролан Гарос. Со него сум играл повеќе пати, и досегашниот резултат е 4-1 за мене“.
Статистиката од првите два меча покажува интересна коинциденција, и во двата натпревари Калин имаше ист број на асови – по девет и по 35 „винери“, што го наметнува прашањето кој сегмент во играта му е најквалитетен?
„Сервисот и првата топка. Генерално ги правам поените со форхенд, но и бекхендот ми е солиден со кого можам да направам поен. Исто така, доста сум креативен во играта, за противникот во секој момент можам непредвидливо да изиграм и да го сменам ритамот“.
Кога правиме рекапитулација за досегашните настапи на Вимблдон, не можеме да го одминеме и моментот од мечот против Мендес, кога победничкиот поен и воедно ас, Калин го отсервира во стилот на Ник Кириос со твинер сервис. Овој поен не остана незабележан и од страна на организаторот на Вимблдон, така што снимката беше објавена и на официјалната Инстаграм страница на Вимблдон (https://www.instagram.com/p/CfottSQDqrt/), и со 45 илјади лајкови е за 20 илјади повеќе од првата наредна снимка со кралските наследници Принцот Вилијам и Принцезата Кејт Мидлтон.
„Искрено, не го направив тоа за да го имитирам Кирјос, бидејќи не сум негов фан. Едноставно, водев 6-1 и 5-2, бев опуштен и си викам ајде ќе го пробам на меч топка, па, да видиме како ќе испадне“.
Ако не Кирјос, тогаш кој му е омилен тенисер од повозрасните колеги?
„Новак Ѓоковиќ. Најмногу затоа што е ментално силен. И не се срами да покаже дека има став. Баш го има она нашето, балканското. Надал сите го сакаат, но тој е мирен, нема таков темперамент како Ѓоковиќ. Друго се тие од Шпанија, друго сме ние од Македонија, Србија, Хрватска. Затоа најмногу ми се допаѓа Ноле. Секако дека ми се допаѓаат и Надал и Федерер како играат, но Ноле ми е најомилен“.
Нема сомнеж дека на Калин му претстои блескава иднината во тенисот, која во недела може преку ноќ да му постане стварност и да го лансира во тениското соѕвездие. Но, и ако тоа не се случи, тој цврсто верува дека евентуалниот неуспех нема да го поколеба да верува во себе или да потклекне пред разните искушенија кои ги носи младоста.
„Тенисот ми е приоритет во животот. Не знам што друго би правел, ако не играм тенис. Така што, нема опасност интересот да ми отиде во некоја друга насока “.
А, и вистинска штета би било тоа, ако се има во предвид колку години посветил на тенисот, од какви сè задоволства се откажувал во детството за да дојде до денешната позиција да важи за еден од фаворитите на Вимблдон. Затоа, на крајот, се навративме на почетокот:
„Јас почнав да играм тенис на четири години. Пред тоа играв фудбал, но бидејќи сестра ми тренираше тенис и јас се префрлив на него. Сериозно почнав да тренирам на девет години, кога се преселив во Виена, каде имав два тренери Иван Галиќ и Вјеран Фришчиќ. На 12 години отидов во близина на Кан во Франција, на академијата Муратоглу и таму останав две години. Потоа се преселив во Сплит, Хрватска и таму останав една и пол година со тренерот Марин Брадариќ. Од Сплит се преселив во Загреб и го сменив тренерот со Иван Цинкуш, кој пред мене му беше тренер на Марин Чилиќ, а и сега му е тренер. Мојот сегашен тренер, е поранешен тренер на Бернард Томиќ, Зофко“ – го заврши Калин, како што ни објасни, своето прво интервју на Вимблдон.
Го очекуваме второто-победничко, в недела!
Текст и фото од Вимблдон: Ненад Живановски
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Аргентина без Меси против Ел Салвадор и Костарика
Капитенот на Аргентина, Лео Меси ќе ги пропушти двата пријателски натпревари што ќе ги одигра светскиот шампион против Ел Салвадор (22 март) и Костарика (26 март). Двата натпревари ќе се играат во Соединетите Американски Држави.
Ѕвездата на Интер од Мајами се пожали на полесна повреда и постоеја шанси да биде во тимот на Аргентина, но сега е сигурно дека тоа нема да се случи,. Сепак, Лео ќе се приклучи во репрезентативниот камп во Филаделфија, за да им пружи морална поддршка на соиграчите.
Воедно, поради повреди Пауло Дибала и Маркос Сенеси од Бурнмаут нема да го носат дресот на Аргентина, па селекторот Лионел Скалони го повика капитенот на Бетис, Гвидо Родригез, кој се рехабилитираше од повредата.
„Целта на Меси и на клубот е да се врати на терените на почетокот на април, за четвртфиналниот натпревар од Купот на КОНКАКАФ“, изјави на оваа тема тренерот на Интер од Мајами, Херардо Мартино.
Во осминафиналето Интер го исфрли Нешвил, а токму на таа средба 36-годишниот аргентински ас заработи повреда на мускулот.
По голот и асистенцијата мораше предвреме да ја напушти играта, па не го ни одигра првенствениот натпревар против Ди-си Јунајтед пред неколку дена.
Спорт
Штрајх го напушта Фрајбург по повеќе од 12 години
Тренерот на Фрајбург, Кристијан Штрајх, по повеќе од 12 години ќе го напушти клубот на крајот на сезоната, објави клубот. Штрајх, кој е на клупата на Фрајбург од јануари 2012 година, реши да не го продолжи договорот.
Штрајх, во Фрајбург кина 29 години, пред да го преземе првиот тим, ги тренираше младинските категории.
„Долго размислував и имав многу дискусии, но верувам дека е вистинско време да отстапам место на нова енергија, нови луѓе и нови можности“, вели 58-годишниот Штрајх во видеото објавено на клупската веб-страница.
Под негово водство, Фрајбург го доживеа најпросперитетниот период во својата историја. Во сезоната 2022/23 првпат во историјата го одведе клубот до осминафиналето на Лигата на Европа, а во 2022 година не успеа да го постигне најголемиот успех, Фрајбург го загуби од Лајпциг финалниот меч во Купот на Германија.
Штрајх добиваше понуди од неколку германски клубови со поголеми буџети, но секогаш избираше да остане во Фрајбург.
Спорт
Поп за Вембањама: Сите мои најдобри вина се постари од него
Во својата прва НБА сезона, Французинот Виктор Вембањама докажува дека големиот интерес што го предизвика неговиот трансфер во Сан Антонио е оправдан. Вемби беше први пик на драфтот, а во својата прва сезона покажува дека е генерациски талент.
Во 60. натпревари што ги одигра досега оваа сезона, тој има просек од 20,8 поени (46% од поле, 32% за три, 80% пенали), 10,4 скока, 3,5 асистенции, 3,5 блокади.
Изминатата ноќ, Вемби одигра историски меч, во победата над Бруклин забележа 33 поени 15 скока, 7 асистенции, 7 блокади и 4 загубени топки.
Сигурно е дека најголемите заслуги за неговата брза адатација во НБА има Грег Попович, тренерска легенда во НБА.
„Вембањама е мултиталентиран млад чове“. Ќе ни покаже работи кои никогаш не сме ги виделе. Денешниот натпревар беше еден од нив. Тој е се подобар во контакт играта, се навикна дека противничката одбрана посебно внимава на него. Тој е во тешка позиција и одлично се справува со тоа“, изјави „Поп“ по уште една фантастична партија на младиот Французин.
Дали тренерот Попович е возбуден што ќе продолжи да работи во НБА во следните пет години?
„Се возбудувам само кога ќе видам дека имам постаро шише француско „Бордо“ и се грижам дека не е премногу старо, а потоа сфаќам дека всушност е совршено. И сите мои најдобри вина се постари од Виктор. Тоа е вистината“.