Спорт
Елмас и Наполи ги исфрлија Лацио во драматичен меч од Копа Италија (видео)
Наполи стигна до тешко извојувана 1:0 победа над Лацио во четврт-финалето од Копа Италија, исфрлувајќи го актуелниот шампион во натпреварувањето по лудото прво полувреме во кое имаше гол во втората минута, два црвени картони и промашен пенал. Во полуфиналето, Наполи ќе игра или со Интер или со Фиорентина.
Мечот на „Сан Паоло“ не можеше да започне подобро за домашниот тим – по само 90 секунди, капитенот Лоренцо Инсиње во соло напад успеа да го совлада Томас Стракоша со убав удар за рано водство.
Лацио бргу се созеде и веќе во 10-тата минута изнуди пенал, откако Елсеид Хисај го собори Фелипе Каиседо во шестнаесетникот. Меѓутоа, Чиро Имобиле во својот роден град Неапол, направи катастрофална грешка и го утна пеналот.
Драмата не заврши тука – Хисај направи уште еден груб старт над Имобиле за да добие втор жолт картон и да ги остави Наполи со 10 луѓе по само 19 минути. Рамнотежата се врати, кога Лукас Леива доби експресно два жолти картони (еден за груб старт и еден за расправање со судијата) за да се врати рамнотежата на теренот.
Во второто полувреме, Џенаро Гатузо му даде шанса и на македонскиот репрезентативец Елиф Елмас, но иницијативата беше кај Лацио. Во 84. минута Имобиле ја погоди пречката, а во 89. минута топката беше во голот на Наполи, но Франческо Ачерби беше во офсајд и голот беше поништен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Тројцата исклучени во дербито ги дознаа казните
Дисциплинскиот судија во Серија А експресно ги одреди казните за играчите кои синоќа беа исклучени на натпреварот помеѓу Милан и Интер во 33. коло од Серија А. Интер славеше со 2.1 и ја обезбеди титулата на пет кола до крајот на сезоната.
Капитенот на Милан, Давиде Калабрија, доби црвен картон во 97.минута, откако го удри без топка Давиде Фратези. Тој е суспендиран на два натпревари.
Во петтата минута од судиското надополнување дојде до тепачка помеѓу играчот на Милан, Тео Ернандез и играчот на Интер, Дензел Дамфрис, по што и двајцата добија црвени картони. Тие ќе пропуштат еден натпревар.
Дисциплинскиот судија им изрече и парични казни од по 10.000 евра.
Спорт
Покетино: Лукаку е играч на Челси
Ромелу Лукаку, во целост ја оживеа кариерата во Рома. Клубот има можност да го откупи неговиот договор, но прашање е дали има пари да вложи во трансферот на Белгиецот.
Лукаку не успеа да се наметне во Челси, самиот побара да замине, а неколку пати изјави дека нема намера да се враќа во Лондон. Минатата сезона ја мина во Интер, а оваа е во Рома.
За статусот на курпулентниот Белгиец проговори и тренерот на сините, Маурисио Покетино.
„Тој е играч на Челзи, па ќе обрнеме внимание на него. Ваков став во овој момент има клубот, но се уште немаме донесено никаква одлука“, изјави Покетино.
Лукаку оваа сезона постигна 18 гола на 41 натпревар за Рома во сите натпреварувања.
Спорт
Инзаги по освојувањето на титулата: Неверојатно чувство, момците се исклучителни
Со победата од 2:1 над градскиот ривал Милан, фудбалерите на Интер синоќа ја освоија 20. титула во италијанската Серија А и ја сошија втората ѕвезда над грбот на својот клуб.
Интер ја круниса доминантна сезона во Италија и на пет кола до крајот има 17 бода повеќе од Милан.
„Нероаѕурите“ беа убедливи во текот на целата сезона, на 33 натпревари претрпеа само еден пораз, и тоа на домашен терен од Сасуоло.
Тренерот Симоне Инзаги конечно стигна до Скудетото во неговата трета сезона во Интер.
Едвај ја задржа работата на крајот од првата сезона, кога во финишот на сезоната 2021/2022. му ја предаде титулата на Милан, но минатата сезона го одведе Интер до финалето на Лигата на шампионите, а сега ја освои Серија А.
„Неверојатно е чувството, постигнавме нешто извонредно. Има многу протагонисти во овој успех. Пред се, играчите, исто така и директорите, а потоа и Стивен Жанг, за се што ни овозможи на ова патување. Моите мисли одат и кај моето семејство, сопругата и децата, родителите… Мојата мана е што понекогаш не можам да ја напуштам работата и да ја носам дома, но моето семејство е основата на сè“, рече Инзаги.