Хрватскиот ракометар Иван Чупиќ, десното крило на скопски Вардар по враќањето на својата селекција во татковината ги искажа импресиите по одиграниот шампионат.

„Не може да е добро кога не отидовме во четвртфинале, одигравме многу лош меч со Данска и резиме на се е дека требаше и можеше подобро. Ни фалеше од се по малку, и одбрана, транзиција напад, играчи, помалку повреди. Не треба да се бара алиби затоа што овој резултат е нашата реалност“ рече Чупиќ за хрватските медиуми по доаѓањето во Загреб.

Хрватскиот репрезентативец одигра на Мундијалот помалку од 2 часа, а своето најдобро издание го имаше против Аргентина (Хрватска доживеа пораз од „Гаучосите“), со 7 гола. Играчот за кој се споменува дека ќе го напушти „црвено-црниот“ дрес и ќе се врати во редовите на Загреб го прогнозираше и изгледот на финалната двојка на шампионатот.

„Норвешка се подигнува, Франција се мачи, но секогаш е Франција, Данците изгледаат самоуверено и моќно, Шпанците знаат да играат важни мечеви и тоа се главните 4 фаворити. Ги гледам Данците и Норвежаните како најголеми фаворити иако ќе одлучува една топка“ смета хрватскиот ракометар.

Точно една година помина од трагичната хеликоптерска несреќа во која меѓудругите животот го загуби и кошаркарскиот ас, Коби Брајант – трагедија која го здрма спортскиот свет. Веста за трагедијата на Коби, српскиот тениски ас, Новак Ѓоковиќ го затекна на Австралија опен.

„Тој е еден од најголемите спортисти на сите времиња, ме инспирираше мене и многу други. Ја имав таа среќа да имам одличен однос со него, ми беше поддршка кога ми беше потребно, ми даваше совети, секогаш беше тука. Тој беше мојот ментор, мој пријател“ рече Ѓоковиќ пред 366 дена.

Српскиот тенисер се сети на својот пријател и на 23 август минатата година кога Коби требаше да го прослави својот роденден. Ноле на Коби се сети и денеска, на денот кога замина во вечноста.

На Инстаграм сподели фотографија од нив двајцата со краток опис на англиски и на италијански:

„Засекогаш Мамба. Те сакам, пријателе мој“.

Иако аргентинскиот ас од Барселона, Лео Меси во интервју пред неколку дена рече дека нема да одлучува за својата фудбалска иднина пред да заврши тековнава сезона, од Франција стигнуваат други бранувања. Во земјата на „галските петли“ се чини сакаат по секоја цена да го видат аргентинскиот фудбалски виртуоз во дресот на ПСЖ пред да му истече договорот со Каталонците.

Пред една недела спортскиот директор на „Светците“ наведе дека играч од типот на Меси секогаш бил на радарот на овој клуб, а соиграчот на Меси од репрезентацијата, Леандро Паредес посочи и дека постојано го следат аргентинскиот ас, но одлуката дали ќе дојде во Париз е исклучително само на играчот.

На сета оваа мешаница, еден од најдобро упатените француски спортски новинари, Жефри Герети (ТВ Канал плус) изјави дека цело семејство на Меси учи француски, одат на приватни часови.

„Зошто учи француски ако потпише за Манчестер Сити? Нема смисла. Оваа информација која можам да ја потврдам е од многу доверлив извор“ изјави Герети.

Додека траат турбуленциите во Франција, Меси ќе може да се врати на теренот веќе на дуелот против Рајо Ваљекано откако заработи суспензија од 2 меча поради црвениот картон против Атлетик Билбао.