На нешто повеќе од еден месец пред почетокот на Светското првенство, најдобриот стрелец во историјата на уругвајската фудбалска репрезентација, 39-годишниот Луис Суарез изјави дека е отворен за евентуално враќање во националниот тим.

За потсетување, легендарниот напаѓач, реши да се пензинира од националниот тим, во септември 2024 година, по недоразбирањата со селекторот Марсело Биелса.

Пред повеќе од 18 месеци, Суарез го обвини Биелса дека создава раздор во тимот и дека се однесува ладно кон играчите.

„Тогаш кажав некои работи што не требаше да ги кажам. Мора да бидете способни да ги признаете своите грешки, за мене тоа сега е минато. Ако мојата земја има потреба од мене, никогаш нема да кажам не. Додека сум активен, ќе бидам достапен“, рече поранешниот напаѓач на Ливерпул, Барселона и Атлетико Мадрид, а сега на Интер Мајами.

За време на својата богата кариера, Суарез одигра 143 натпревари за репрезентацијата и постигна рекордни 69 гола. Пред 15 години, тој го освои првенството на Јужна Америка со Уругвај, а беше учесник и на четири светски првенства, па годинашното, доколку сегашниот селектор на Уругвај Биелса го врати во составот, би му било петто.

Светското првенство се игра од 11 јуни до 19 јули во Соединетите Американски Држави, Канада и Мексико, а Уругвај влегува во него од групата Х, каде противници ќе му бидат репрезентациите на Шпанија, Зелено’ртските острови и Саудиска Арабија.

Foto/ Depositphotos

Селекторот на ракометната репрезентација на Македонија, Кирил Лазаров, го објави списокот на играчи за претстојниот бараж натпревар против Словачка за пласман на Светското првенство 2027.

Првиот меч помеѓу Словачка и Македонија ќе се игра на 14 мај во Прешов, а реваншот е три дена подоцна во салата „Борис Трајковски“ во Скопје.

Репрезентативците првиот собир ќе го имаат на 10 мај.

Извор и фото/ macedoniahandball.com.mk

Баерн Минхен повторно покажа интерес за крилниот напаѓач на ПСЖ, Бредли Баркола. Според „Скај Спорт Германија“, спортскиот директор Макс Еберл се распрашувал за можноста евентуалниот трансфер да се случи во летниот преоден рок, но одговорот од Париз наводно бил разочарувачки.

ПСЖ бара обештетување до 90 милиони евра за својот играч, износ што германскиот шампион не може или не сака да го плати. Баерн и неколку други европски гиганти беа заинтересирани за Баркола и минатото лето, но ПСЖ ја одби продажбата, а Баварците се свртеа кон Луис Дијаз, кого го доведоа од Ливерпул за 70 милиони евра, што се покажа како одличен потег.

И покрај успешниот трансфер на Дијаз, извештаите сугерираат дека клубот од Минхен сè уште бара разновиден напаѓач. Од друга страна, 23-годишниот Баркола наводно е многу незадоволен од својата улога во Париз, каде што најчесто е резерва.

Така беше и во полуфиналето од Лигата на шампионите против Баерн, каде во двата натпревари доби шанса во последните 15-тина минути.

Иако неговиот договор е со важност до 2028 година, па ПСЖ не е под притисок да го продаде, упорноста на играчот би можела да ја промени ситуацијата. Се вели дека пред неколку месеци тој го одбил понуденото продолжување на договорот.

Во контекст на потрагата по засилувања, Баерн се поврзува со крилниот напаѓач на Њукасл, Ентони Гордон, кој наводно сака да го напушти „Сент Џејмс Парк“ и би можел да се вклопи во нападот зад Хари Кејн.

Сепак, според „Атлетик“, внатрешна цел број еден за Баварците е Јан Диоманде од РБ Лајпциг.

Што се однесува до Баркола, Баерн не е единствениот што е заинтересиран. „Скај Спорт“ наведува дека го следат неколку врвни клубови и дека неговите менаџери се во преговори со Барселона, Ливерпул и Арсенал. Арсенал наводно најмногу инсистира на трансферот.

Foto/ Depositphotos