Кошаркарите на Уникс од Казањ изборија пласман во финалето на Еврокупот и место во Евролигата наредната сезона. Уникс за титулата во ова натпреварување ќе се борат со Монако.

Уникс, во Болоња, ја доби мајсторката против Виртус со 107:100 и со 2:1 ја доби серијата. Виртус, тим во кој играат МилиошТеодосиќ и Марко Белинели повторно не успеа да стигне до Евролигата.

Рускиот тим, го контролираше натпреварот, најчесто играчите на Виртус имаа двоцифрена предност. Виртус се вратија во последниот период, но не успеаја да направат пресврт.

Теодосиќ со 25 поени и девет асистенции, односно Белинели со 24 поени го предводеа Виртус. Кај Уникс се истакнаа Смит со 24, односно Вајт и Браун со по 20 поени.

Покрај Уникс и Монако наредната сезона ќе игра во Евролигата, бидејќи Валенсија не успеа да избори четврт-финале во најквалитетното европско натпреварување.

Финалната серија ќе започне на 27.април, трофејот ќе го освои тимот што ќе забележи две победи.



Лука Дончиќ со луда тројка им донесе победа на Далас Маверикс во дуелот со Мемфис Гризлис 114.113.

Словенецот на 1,8 секунди до крајот, прими топка од аут, мина крај двајца играчи на Мемфис, се одрази од една нога, надвор од балансот и погоди за победа.

Дончиќ, во последните 78 секунди, имаша неверојатна секвенца. Гризлис имаа предност од пет поени, Дончиќ подели рампа, му асистираше на Прозингис, потоа поентираше и за крај постигна неверојатна тројка.



Борусија Дортмунд, според очекувањата, не успеа да го елиминира Манчестер сити од четврт-финалето на Лигата на шампионите, губејќи го реваншот со 1:2, меѓутоа, мечот уште еднаш покажа дека „милионерите“ знаат како да ги соберат најголемите фудбалски таленти, за кои подоцна добро ќе искешираат.

И тоа не се работи за Ерлинг Халанд, кој веќе стана суперѕвезда на 20 години и е на листата на желби на најголемите европски клубови, туку на еден 17-годишник од Англија – Џуд Белингам.

Иако во јуни ќе наполни 18 години, се работи за фудбалер кој има веќе 80 сениорски натпревари во две цели сезони со Бирмингем сити и Борусија Дортмунд, а во двомечот против Сити покажа дека не е тука само за да се „брои“. На првиот меч во Англија му беше поништен регуларен гол, а во Дортмунд, тој го најде патот во мрежата на Едерсон.

Белингам стана најмладиот фудбалер во историјата на Бирмингем и најмлад стрелец во август 2019 година, станувајќи клучен член во тимот под тренерот Пеп Клоте. Тој одигра 44 меча како 16-годишник, и Дортмунд плати 25 милиони евра, победувајќи ги Манчестер јунајтед за неговиот потпис.

Неговото влијание во Бундеслигата веднаш беше забележливо, а веќе во ноември 2020 го доби првиот повик во англиската репрезентација како трет најмлад репрезентативец во историјата по Тео Волкот и Вејн Руни.

„Тој го заслужи тоа. Во Дортмунд дава 110 отсто, неговите перформанси се од светска класа“, вели неговиот колега од Борусија и од репрезентацијата, Џејдон Санчо.

Против Сити, тој покажа дека може да се „носи“ со имиња како Кевин де Брујне во средината, но и дека е одличен и во одбраната и во нападот.

Графика: Sofascore за Топспорт.мк