Спорт
Грците испаднаа од СП, победија со недоволна разлика
Грчките кошаркари ја победија Чешка 84:77 но не успеаја да се пласираат во четврт-финалето на Светското првенство во Кина. На Грците им беше потребна победа со најмалку 12 поени разлика за во евентуалниот круг со Бразил и Чешка да бидат најдобри.
Натпреварите во оваа група ќе завршат со дуелот помеѓу САД и Бразил. Доколку се остварат реалните прогнози и Американците победат тогаш Бразил, Чешка и Грција ќе имаат по три победи и два порази, а поради најдобрата кош-разлика заедно со САД во четврт-финалето ќе одат и Чесите.
Чесите одиграа храбро против Грција, иако ротацијата им беше скратена поради неиграњето на повредениот Блејк Шилд. Водеа на полувреме, а успеаја да се вратат три пати од минусот од 12 поени.
Грците направија голем пресврт и целосно ја презедоа контролата врз натпреварот во финишот на третиот период кога доминираа благодарение на братот на Јанис Адетокумбо, Танасис. Повозрасниот од браќата за помалку од три минути постигна 11 поени.
Во последниот период Чесите константно држеа едноцифрена негатива, а сите дилеми ги реши Бохачич со погодената тројка на 107 секунди до крајот на мечот.
Бохачик на крајот заврши со 25 поени, а Саторански беше блиску до трипл-дабл (13 поени, 8 скока, 9 асистенции). Грција ја предводеше Калатес со 27 поени и по 6 скока и асистенции, додека најголемата ѕвезда Јанис Адетокумбо забележа 12 поени и 9 скока.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Куртоа се враќа до крајот на сезоната
Tренерот на Реал, Карло Анчелоти денеска изјави дека голманот Тибо Куртоа треба да се врати во тренажен процес за десет дена, пренесуваат шпанските медиуми.
На 20 март Куртоа беше опериран поради скинат менискус на десното колено. Шпанските медиуми потсетуваат дека белгискиот голман требаше да паузира до крајот на сезоната, но Анчелоти тврди дека Куртоа успешно се опоравува.
„Куртоа добро закрепнува, би можел да биде во тимот против Кадиз“, изјави Анчелоти.
Шпанските медиуми пренесуваат дека Куртоа сигурно ќе го пропушти натпреварот против Реал Сосиедад во Ла Лига, како и првиот полуфинален натпревар од Лигата на шампионите против Баерн.
Натпреварот од 34. коло во шпанското првенство помеѓу Реал и Кадиз ќе се одигра на четврти мај во Мадрид.
Спорт
Евролигата нема да го толерира однесувањето на Атаман
Кошаркарската Евролигата се огласи по бурната реакција и изјава на Ергин Атаман по поразот на Панатинаикос од Макаби, во Атина на стартот од четвртфиналната серија.
Во соопштението на веб-страницата на елитното натпреварување, се нагласува дека е недозволиво Атаман да ги етикетира судиите, дека таков приситсок нема да биде толериран и дека е покрената дисциплинска постапка против тренерот на Панатинаикос.
За потсетување, Атаман веднаш по натпреварот потенцираше дека судиите му доделиле шест поени на Балдивин, бидејќи досудиле два непостоечки, смешни фаули при шут за три поени, но во исто време нагласи дека ПАО продолжува понатаму, до завршниот турнир во Берлин.
Атаман на прес-конференцијата отиде чекор понатаму, велејќи дека ќе го напушти Панатинаикос доколку не избори пласман на завршниот турнир.
Макаби води во четвртфиналната серија со 1-0, вториот меч се игра вечерва повторно во Атина, а потоа следуваат два натпревари во Белград – 30 април и 2 мај, а евентуалната мајсторка ќе се игра на 8 мај во Атина.
Спорт
Гвардиола за Жоао Кансело: Ќе видиме на крајот на сезоната
Жоао Кансело е член на Манчестер Сити, а моментално е на позајмица во Барселона до крајот на сезоната. Прашање е дали Барселона сака да го отткупи неговиот договор, откако Португалецот беше означен како еден од главните виновници за елиминацијата од ПСЖ од Лигата на шампионите и поразот од Реал во Ел Класико.
Менаџерот на Манчестер Сити, Пеп Гвардиола изјави дека на крајот на сезоната ќе одлучи дали Кансело ќе се врати во клубот, пренесуваат британските медиуми.
„Се уште не сме разговарале за иднината на Кансело во нашиот клуб. Ќе разговараме на крајот на сезоната“, изјави Гвардиола.
Кансело (29) е член на Манчестер Сити од 2019 година. Тој има договор со англискиот клуб до 30 јуни 2027 година.
Вториот дел од минатата сезона Кансело го мина на позајмица во Баерн, а потоа Манчестер Сити го испрати португалскиот фудбалер на едногодишна позајмица во Барселона.
Кансело оваа сезона одигра 36 натпревари за Барселона и постигна четири гола.