Енис Барди по три месеци надвор од стројот поради повреда, доби шанса да влезе во последните десетина минути од мечот на неговиот Леванте со Валјадолид, кога резултатот беше 2:2, како што заврши мечот од 20-тото коло на шпанската Ла лига.

Даниел Гомез ги донесе Леванте во водство во 62. минута, но гостите направија пресврт за пет минути, преку Алкараз (73.) и Плано (78.), пред во 83. Роџер да израмни на 2:2. Барди влезе во игра во 84. минута, но Леванте не успеа да стигне до шестата победа оваа сезона.

Леванте се на 10. место во Ла лига со 23 поени, додека со три поени помалку Валјадолид се на 15-тото место.

Пари Сен-Жермен се одвои на три поени од Лил на врвот на табелата во Франција, откако лесно со 4:0 ги совлада Монпелје во меч од 21. коло во Лига 1.

Текот на мечот беше утврден уште во 19. минута, кога голманот на гостите, Јонас Омлин доби црвен картон за еден брутален старт на Килијан Мбапе. Токму Мбапе го отвори резултатот во 34. минута, пред во второто полувреме, „светците“ да ја искористат предноста од играч повеќе за да постигнат три гола за само три минути – Нејмар во 60-тата минута, Мауро Икарди во 61-та минута, и Мбапе уште еднаш во 63-тата минута.

Ерлинг Халанд уште еднаш го покажа својот неверојатен талент за голови со два гола во шест минути, но тоа не помогна на Борусија Дортмунд која во „Борусен дербито“ загуби на гости кај Борусија Менхенгладбах со високи 4:2.

Мечот започна со поништен гол за Флоријан Нојхаус уште во втората минута, но Менхенглдабах поведе со голот на Нико Елведи девет минути подоцна. Тогаш на сцена стапи норвешкото чудо Халанд, кој во 22. и 28. минута постигна два гола за пресврт. Домаќините, сепак, брзо се созедоа и Швајцарецот Елведи во 32. минута осигура на одмор да се отиде со 2:2.

Рами Бенсебаини ги врати Гладбах во водство во 49. минута, пред во 78. минута, Маркус Турам да ги постави конечните 4:2. Менхенгладбах со победата ги прескокна Дортмунд на четвртото место на табелата со 31 поен, додека „милионерите“ се петти со 29 поени по двата порази во низа.