Марио Балотели покажа колку им е потребен на Бреша, откако по враќањето во составот од страна на старо-новиот тренер Еугенио Корини, постигна важен гол за 1:0 победа на гостувањето кај СПАЛ.

Со трите поени по само третата победа оваа сезона, Бреша се крена од последното место на табелата (каде што сега е СПАЛ) и сега имаат 10 поени, само еден помалку од Џенова на Горан Пандев, која денеска одигра 2:2 кај Лече.

Фиорентина на Винченцо Монтела, пак, очигледно е во голема криза, откако Виола загуби четврти пат едноподруго, овојпат со 2:1 на гостувањето кај Торино. Симоне Заза и Кристијан Ансалди беа стрелци за „биковите“, а Мартин Касерес во финишот на мечот успеа само да намали на 2:1.

Во третиот попладневен меч, Каљари се врати од 2:0 негатива на гостувањето кај Сасуоло за 2:2 реми со гол во 90. минута.

СЕРИЈА А, 15.КОЛО

СПАЛ – Бреша 0:1

Торино – Фиорентина 2:1

Сасуоло – Каљари 2:2

Лестер сити на Брендан Роџерс по сè изгледа е најсериозниот ривал на Ливерпул за титулата во Премиер лигата оваа сезона по 4:1 триумфот на гостувањето кај Астон вила, за 12. победа оваа сезона со која се доближија на осум поени од лидерот.

Џејми Варди постигна два гола, со што е стрелец во последните осум натпревари на Лестер, Џони Еванс и Келечи Ихеаначо додадоа по еден за убедлив триумф на „Вила парк“ кој во ниту еден момент не беше неизвесен. Варди оваа сезона има постигнато неверојатни 16 гола.

Во другите попладневни мечеви, Шефилд јунајтед се врати од 1:0 негатива за 2:1 победа на гости кај Норич, додека Њукасл успеа со сличен пресврт да стигне до 2:1 триумф над Саутемптон.

ПРЕМИЕР ЛИГА, 16.КОЛО

Астон  вила – Лестер 1:4

Њукасл – Саутемптон 2:1

Норич – Шефилд јунајтед 1:2

Реал Бетис стигна до 3:2 победа над Атлетик Билбао за трет триумф во низа за клубот од Севилја, откако Хоакин постигна неверојатен хет-трик во првите 20 минути од мечот.

Капитенот Хоакин стрелаше во 2., во 11. и во 20. минута за неверојатен старт на Бетис против шестопласираниот тим на табелата, по што гостите не успеја да се вратат во игра. Со своите 38 години, Хоакин е најстариот стрелец на хет-трик во историјата на Ла лига.

Ињаки Вилијамс од пенал во 44. минута успеа да намали на 3:1, а Јури Берчиче во 75. минута погоди за 3:2,  но тоа беше сè што го направи баскискиот клуб.

Со трите поени, Бетис се искачи на 11. место на табелата со 22 поени, додека Атлетик останува на шестото место со 26 поени.

Претходно, Хетафе стигна до 1:0 победа на гостувањето кај Еибар за да се искачи на четвртото место на табелата.