Спорт
Клоп и Тухел удрија по мундијалот во Катар
Менаџерите на Челси и на Ливерпул, Томас Тухел и Јирген Клоп, го изразија своето незадоволство од Светското првенство во Катар, кое ќе се одржува во ноември и декември сметајќи дека така се поставуваат нереални очекувања од нивните фудбалери.
Според Тухел, фудбалерите ќе бидат под влијание на подготовките на мундијалот неколку месеци пред тој да се случи, а Клоп призна дека е лут што ФИФА и УЕФА не прават повеќе да ги заштитат фудбалерите. Премиерлигашката сезона ќе биде во пауза од 12 ноември и ќе се врати на 27 декември за да се направи место за мундијалот, кој ќе се одржи од 21 ноември до 18 декември.
„Навистина нема многу смисла. Фудбалерите уште сега се фокусирани на Светското првенство, што е добро бидејќи се во форма и се грижат за својата подготвеност. Но, исто така е лошо бидејќи како ќе се доближува мундијалот, нема да се тука ментално. Ќе видиме како ќе влијае на перформансите во октомври, на пример. Ќе бидат исцрпени. Голем успех или големо разочарување може да влијаат и ментално, така што не сум сигурен дека ова е одбра идеја“, вели Тухел.
Клоп, пак, ја спореди ситуацијата со климатските промени велејќи дека сите зборуваат, но никој не се активира.
„Ако одите во финале на Светското првенство и го освоите или загубите, веќе сте одиграле многу, а потоа една недела подоцна треба да играте. Да имаа сите фудбалери пауза, немаше да биде проблем. Но, ова е како зимска пауза, што ја имавме во Германија, како фудбалер и три-четири недели пауза се многу. Кога ќе зборувам за ова, многу се лутам. Исто како со климата. Сите знаеме дека мора да се смени нешто, но никој не презема ништо. Играчите треба да се најважни во овој спорт. Ова Светско првенство се случува во погрешен момент поради погрешни причини“, вели Клоп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Заврши сезоната за Енцо Фернандес
Играчот од средниот ред на Челзи, Енцо Фернандес, ја заврши сезоната, бидејќи наскоро ќе мора да оди на операција на препоните, пишува аргентинскиот весник „Оле“. Според овој извор на Фернадес ќе му бидат потребни неколку недели за рехабилитација.
Поранешниот фудбалер на Ривер Плејт и Бенфика, извесно време се жалеше на болки, но сепак играше. Постоеше опција лекувањето да се одложи до лето, но по консултација со лекарите на Челзи и аргентинската репрезентација тој одлучи веднаш да биде опериран.
Планот е Фернандес да има доволно време целосно да се опорави за претстојната Копа Америка која започнува на 20 јуни.
Светскиот шампион пристигна на „Стемфорд Бриџ“ од Лисабон во јануари 2023 година во трансфер вреден 121 милион евра. Неговите настапи оваа сезона, сепак, се во склад со перформансите на повеќето играчи на Челзи – неубедливи и нестабилни.
Енцо оваа сезона одигра 40 од 45 натпревари за „сините“.
Спорт
Ла Лига од следната година ќе се игра во САД
Претседателот на шпанската Ла Лига, Хавиер Тебас, даде неколку интересни коментари во интервју за „Експансион“. Тамошната јавност најмногу ја коментира изјавата во која тој отворено призна дека навива за Реал Мадрид. Овој факт е познат одамна, но сега за прв пат е и јавно потврден. Тебас го откри овој детал коментирајќи ја приказната за доаѓањето на Килијан Мбапе во Реал.
Сепак, претседателот на една од најдобрите светски лиги донесе и по малку шокантна вест за сите љубители на традиционалниот фудбал. Имено, од сезоната 2025/26, некои натпревари од Ла Лига ќе се играат во Соединетите Американски Држави.
Тоа значи дека веќе следната година би можеле да го видиме првиот натпревар од шпанското првенство на американска почва.
„САД е втор најголем пазар за нас, веднаш по Шпанија. Тоа ќе ја зајакне нашата позиција таму. Другите европски лиги веќе работат таму и немаме избор, во спротивно ќе не избришат“, рече Тебас.
Инаку, уште во 2018 година имаше предлог да се игра каталонското дерби меѓу Барселона и Џирона во САД, но УЕФА го блокираше тој потег.
Спорт
Абердин ќе бара 8.000.000 фунти за Миовски
Македонскиот репрезентативец Бојан Миовски, во летниот преоден рок ќе го напушти Абердин. Шкотските медиуми пишуваат дека интерес за Македонецот покажале великаните не само на шкотскиот туку и на европскиот фудбал, Ренџерс и Селтик. Според овие извори поголем интерес постои кај „полицајците“.
Глазгов Ренџерс подолг период внимателно го следи Миовски, кој ја игра најдобрата сезона во кариерата. Во сите натпреварувања, Миовски одигра 48 натпревари, постигна 24 гола.
Цената која треба да ја издвојат заинтересираните клубови изнесува 8.000.000 фунти.
Покрај Ренџерс и Селтик, интерес за Миовски наводно има и кај Феенорд. Актуелниот освојувач на Купот на Холандија, бара замена во нападот за Мексиканецот Хименес, кој извесно е дека ќе го напушти клубот.