Рускиот хокеар и голман на НХЛ тимот Филаделфија Флаерс, Иван Федотов, е приведен во Русија под обвинение за избегнување воена служба, по што бил однесен во воена болница откако му се слошило, изјави неговиот адвокат за руската државна информативна агенција.

25-годишниот хокеар бил приведен од полицијата во Санкт Петербург по барање на военото обвинителство и бил одведен во канцеларијата за регрутирање. Русија од февруари спроведува воена инвазија на Украина.

Неговиот адвокат Алексеј Пономарјев за државната новинска агенција РИА во саботата изјави дека Федотов во петокот бил одведен во канцеларија за регрутирање, а потоа во воена болница откако му се слошило, отфрлајќи ги обвинувањата дека неговиот клиент ја избегнувал воената служба.

Федотов, голманот на рускиот национален тим кој годинава го освои среброто на Зимските олимписки игри во Пекинг, во мај потпиша едногодишен договор со Филаделфија Флаерс, кои го избраа на драфтот уште во 2015 година. Минатата сезона бранеше за ЦСКА Москва во шампионатот на КХЛ.

Најдобриот македонски атлетичар Андреас Трајковски остана без финале на Медитеранските игри во Оран, Алжир, откако покажал симптоми на Ковид-19. Неговиот ПЦР-тест е позитивен, а претходно кренал температура.

Трајковски требаше денеска да се натпреварува во скок во далечина, но сега останува во изолација, без шанса да се бори за медал на Медитеранските игри.

„Многу сум тажен заради настанатата ситуација, затоа што моја најголема цел за оваа сезона беше да освојам медал за Македонија на Медитеранските игри во Оран. Тренинзите се одвиваа според предвидената динамика до вчерашниот ден, бев во одлична форма, но за жал Господ имал други планови за мене. Ќе се вратам уште посилен после ова!“, изјави Андреас Трајковски.

Ливерпул официјално го претстави едно од своите нови засилувања, Фабио Карваљо. „Црвените“ уште на 23 мај објавија дека постигнале договор со Фулам за трансфер на 19-годишниот играч од средниот ред.

Младинскиот репрезентативец на Португалија на „Енфилд Роуд“ ќе настапува со дресот со број „28“.

Карваљо од утре ќе почне да тренира со тимот на Јирген Клоп. Тој е едно од трите нови засилувања за Ливерпул ова лето, заедно со Дарвин Нуњез и со Калвин Ремзи.

„Чувството да се биде во еден од најголемите клубови во светот, ако не и најголемиот, е неверојатно. Среќен сум што сум тука и едвај чекам да започнам. Кога ќе слушнете дека Ливерпул е заинтересиран за вас, има само една мисла во вашиот ум – да се приклучите на тимот. Се надевам дека може да постигнеме големи работи. Веќе разговарав со сите, вклучувајќи го и менаџерот и се чувствувам многу природно“, изјави Португалецот.

Карваљо одигра клучна улога во промоцијата на Фулам во Премиерлигата.