Интер стигна до 2:0 победа над Јувентус во славното „Дерби Д’Италија“ за да се израмни со Милан на челото на табелата и да ги покаже шампионските амбиции, а со вториот пораз во пет меча, во Торино сигурно ќе се поставуваат многу прашања за тренерот Андреа Пирло.

Првиот гол на мечот го постигна поранешниот фудбалер на Јуве, Артуро Видал во 12-тата минута, откако пред стартот на мечот предизвика мала контроверза со (случајното) бакнување на грбот на противникот при прегратката со Џорџо Кјелини.

Тимот на Антонио Конте во 52. минута стигна до 2:0 водство преку Николо Барела по супер-брзиот контра напад на домаќините, а во подобрувањето на играта на Јуве не помогна ниту тројната замена која ја направи Пирло во 58. минута, внесувајќи ги Кулушевски, Меккени и Бернардески на местото на Рабио, Ремзи и Фработа.

Со големата победа, „нераѕурите“, кои последните денови се мета на интензивни шпекулации околу можната продажба на клубот, се искачија на второто место на табелата со 40 поени, колку што има и градскиот ривал Милан, кој утре гостува кај Каљари. Јуве, пак, со натпревар помалку се само петти со 33 поени.

По ремито без голови меѓу Ливерпул и Манчестер јунајтед, Манчестер сити не направи грешка и со 4:0 ги совлада Кристал палас за да избие на второто место на табелата во Премиер лигата со само два поени зад Јунајтед и со натпревар помалку, промовирајќи се во прв кандидат за титулата.

Џон Стоунс го отвори резултатот во 26. минута по неверојатната асистенција на Кевин де Брујне, по што во второто полувреме следуваа уште три гола во мрежата на гостите. Илкај Гундоган во 58. минута зголеми на 2:0, Стоунс во 68. минута со вториот гол зголеми на 3:0, пред Рахим Стерлинг во 88. минута со фантастичен гол од слободен удар да стави печат на убедливата победа.

Со триумфот, тимот на Пеп Гвардиола има 35 поени на второто место, исто како и третопласираниот Лестер, и само два зад градскиот ривал Јунајтед. Палас, со само една победа во последните шест меча, се на 13. место со 23 поени.

Откако Хрватска стигна до 28:20 победа над Ангола и повторно не импресионираше со играта на СП во Египет, нивниот селектор Лино Червар сакаше да посочи дека хрватската репрезентација покажала што умее во минатото и дека овој Мундијал е „супа“, прво СП со 32 репрезентации.

„На ова првенство има два типа на репрезентации, тие кои не беа во изолација, туку тренираа цела година, и оние кои страдаа. Ние не бевме подготвени. Русите и Словенците летаат по теренот бидејќи имаа шампионати. Да не се повтори вакво СП. Со Катар ќе биде многу тешко, но Хрватска претходно покажа која е во Стокхолм и во Австрија, а ова тука е супа. Ова е ништо. ИХФ направи голема работа со 32 репрезентации, но каков квалитет ќе има кога репрезентациите два дена пред стартот дознаа дека патуваат. Некои репрезентации бараа авиони на 20 часа пред првенството. Вистинскиот квалитет ќе го видиме на Олимпијадата во Токио“, вели Червар.