Американскиот атлетичар Џејкоби Тарп постави нов светски рекорд на 110 метри со пречки на натпревар во Јуџин, сојузната држава Орегон.

Дваесетгодишниот Тарп истрча време од 12,75 секунди во квалификациите за Универзитетското првенство на САД, подобрувајќи го за пет стотинки досегашниот светски рекорд од 12,80 секунди, кој од 2012 година го држеше Ариес Мерит.

„Знаев дека сум подготвен за добар резултат, но не очекував да се случи токму тука. Кога го видов времето, останав без зборови“, изјави Тарп.

Младиот Американец минатата година беше шести на Светското првенство во Токио, а пошироката јавност го запозна кога истрча 7,32 секунди на 60 метри со пречки – трет најдобар резултат во историјата на оваа дисциплина.

Градоначалникот на Град Скопје, Орце Ѓорѓиевски, порача дека спортската сала „Расадник“ по три децении повторно е ставена во функција и ќе биде дом на Вардар.

Ѓорѓиевски ја опиша обновата на салата како еден од своите најзначајни проекти, потсетувајќи дека објектот бил затекнат во лоша состојба.

„Расадник е име кое многу значи за Кисела Вода, за Скопје, за Вардар и за македонскиот спорт. Оваа сала памети славни спортски моменти, големи натпревари и генерации спортисти“, напиша Ѓорѓиевски.

Тој посочи дека салата била руинирана, демолирана и оставена без перспектива, но дека со вложувања и поддршка од институциите успеала повторно да заживее.

Обновениот објект располага со реконструиран терен, уредени трибини, нови соблекувални, простории за стручните тимови, теретана, придружни спортски содржини и сопствен систем за греење и ладење.

Ѓорѓиевски се заблагодари за поддршката од премиерот Христијан Мицкоски, Владата и министерот за спорт Борко Ристовски, нагласувајќи дека Расадник повторно ќе биде дом на Вардар и место каде што ќе се создаваат нови спортски успеси.

„Ова е важно за Вардар, но и за децата од Кисела Вода, младите спортисти, спортските клубови и сите идни генерации кои ќе растат со спортот“, порача Ѓорѓиевски.

Кисела Вода доби нова модерна спортска сала со капацитет од околу 1.000 гледачи. На отворањето присуствуваше премиерот Христијан Мицкоски, кој оцени дека станува збор за еден од најсовремените објекти од ваков тип во државата.

„Условите се навистина светски, европски. Можеби во моментот најсовремен ваков објект од овој карактер на ниво на цела држава“, изјави Мицкоски.

Тој истакна дека салата ќе биде место каде што младите ќе спортуваат, ќе се натпреваруваат и ќе се развиваат, изразувајќи надеж дека токму од вакви услови ќе произлезат идни европски и светски спортски ѕвезди.

Според премиерот, проектот е резултат на соработката меѓу Владата, локалната самоуправа и Министерството за спорт, а ваквата поддршка за спортската инфраструктура ќе продолжи и во иднина.