Спорт
Луд финиш на „Луж“, за 120 секунди ПСЖ ја „скрши“ Аталанта и е во полуфинале
Нејмар очаен, Мбапе недолечен, Навас се повреди – Аталанта беше со една нога во полуфиналето на Лигата на шампионите.
Аталанта – ПСЖ 1-0 по 89 минути на „Луж“ во Лисабон. Доказ дека парите не поминуваат доколку не се склопени сите коцки, ќе речат многумина.
Единствениот гол на мечот до таа 89 минута го постигна Пашалиќ, во 27 минута.
Италијанската екипа играше борбено, пожртвувано, голманот (резервниот) Спортиело одличен, смирен, сконцентриран.
Играчите на Аталанта своите противници ги чуваа на половина метар.
На спротивната страна хаос. Нејмар промаши шутеви што претходно лесно би ги реализирал.
Мбапе влезе на средината на вториот дел, но се гледаше дека е недоволно подготвен. Икарди речиси невидлив. Херојот од првиот дел, голманот Навас се повреди, го замени Серхио Рико.
ПСЖ имаше повеќе од играта, создаваше и шанси, имаше повеќе директни удари кон голот на тимот од Бергамо. И тогаш кога сите ја видоа Аталанта во полуфинале – шок.
За 120 секунди ПСЖ со два гола оди меѓу четирите најдобри екипи во ЛШ. Овој меч многу наликуваше на епското финале меѓу Баерн и Јунајтед од 1999 година.
Во 90 минута по асистенција на Нејмар, Маркињос од непосредна близина носи 1-1. На Тухел му олесна. Но играчите на францускиот шампион не сакаа да играат продолженија.
За неколку секунди подоцна, асистира Мбапе, овојпат Чупо-Мотинг гаѓа прецизно за 2-1 за „Светците“. На клупата за резерви скокаат од радост.
ПСЖ е во полуфинале, а таму ќе игра против подобриот од утрешниот двобој Атлетико Мадрид – Лајпциг.
Погледнете:
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Тонали сега е на удар и на Англичаните поради обложувањето
Играчот од средниот ред на Њукасл, Сандро Тонали е под истрага од Фудбалската асоцијација (ФА) поради прекршување на правилата против обложување.
Италијанецот веќе отслужува 10-месечна суспензија од Италијанскиот фудбалски сојуз поради обложување за време на неговото играње за Милан.
Новите докази покажуваат дека Тонали се обложувал и кога дошол во Њукасл. Младиот 23-годишен играч го прекршил правилото дури 50 пати од 12 август до 12 октомври 2023 година.
На Тонали му е даден рок до 5 април да одговори на обвиненијата.
„Добивме потврда дека е покрената истрага. Клубот и Тонали целосно ќе соработуваат. Тоа е се што можеме да кажеме во моментов“, се вели во соопштението за медиумите на клубот.
Тонали пристигна во Њукасл минатиот јули во трансфер вреден 60 милиони фунти од Милан.
Спорт
Најдобриот судија во БиХ поради закани одби да им суди на Железничар и Сараево
Шампионатот на Босна и Херцеговина влегува во завршна фаза, а локалниот портал „Спортспорт“, пишува дека најдобриот судија, Ирфан Пељто одбил да им суди на клубовите кои доаѓаат од главниот град Железничар и Сараево) до крајот на сезоната.
Пељто тоа го направил поради наводните закани што ги добивал тој и неговото потесно семејство, кои ги пријавил во полиција. Најдобриот судија од БиХ за својата одлука го известил Судискиот комитет на Фудбалскиот сојуз на Босна и Херцеговина, кој ја прифатил неговата одлука.
Железничар и Сараево ќе одиграат неколку дерби натпревари до крајот на сезоната, но Пељто нема да суди на ниту еден од нив.
Тој требаше да биде главен судија викендов на дербито меѓу Железничар и Вележ, но главен судија на „Грбавица“ ќе биде Елведин Топузовиќ. .
Пељто гради завидна кариера на меѓународен план и често суди натпревари во Лигата на шампионите. Неодамна судеше на пријателскиот натпревар меѓу Словенија и Португалија, а претходно го судеше и натпреварот Лајпциг- Реал Мадрид.
Речиси е сигурно дека ќе суди на ЕП.
Спорт
Интер подготвува нов договор за Инзаги
Интер е апсолутен лидер во Серија А, прашање е само кога и математички ќе ја обезбеди шампионската титула, која ќе биде прва во кариерта на Симоне Инзаги. 47-годишниот тренер досега има освојувано трофеи само во Купот и Суперкупот на Италија.
Она што Инзаги го направи оваа сезона во Серија А, ги натера клупските челници да ја сменат својата стратегија и да му понудат нов договор на тренерот.
Инзаги досега двапати го продолжуваше договорот со Интер, во 2022 и 2023 година, двата пати клубот му понуди едногодишен договор. Овој пат на 47-годишниот тренер ќе му биде понуден двегодишен договор.
Во однос на претходните години, разликата е што на Инзаги ќе му биде понуден нов договор пред да заврши сезоната, а не откако таа ќе заврши.
Интер е на чекор до освојување на шампионската титула во Серија А, откако по 29 кола е прв на табелата со 76 бодови, 14 повеќе од второпласираниот градски ривал Милан.