Спорт
„Малите“ го кренаа гласот – УЕФА ќе ги преиспита промените во ЛШ
Европската фудбалска унија (УЕФА) ќе ги преиспита плановите за реорганизација на Лигата на шампионите. Причината е што повеќе клубови од среден ранг и навивачки групи сакаат да ги ограничат промените кои ги фаворизираат богатите клубови.
Од УЕФА за Асошиетед прес изјавиле дека нејзиниот Комитет за клупски натпреварувања ќе се состане на 10 мај. Комитетот дава формални предлози за одобрување до Извршниот одбор на УЕФА, кој ќе се состане во Виена истиот ден.
Навивачите и клубовите се загрижени бидејќи сметаат дека новите предлози може да им го отежнат натпреварувањето на повеќето клубови, во случај повеќе пари се насочат кон клубовите кои се натпреваруваат во Лигата на шампионите.
Меѓу нив се и гаранциите дека наместо досегашните шест ќе играат по минимум 10 натпревари во Лигата на шампионите, и давањето на две од четирите места за нови учесници на познати клубови врз основа на нивните „историски заслуги“, доколку според резултатите во националните шампионати не успеат да се квалификуваат.
Тие места со коефициентот вредат десетици милиони евра од наградниот фонд на УЕФА и се предвидени како награда за елитните тимови на кои ќе им се случи лоша сезона.
Промената беше поддржана од Асоцијацијата на европски клубови (ЕЦА), пред некои функционери на ЕЦА да ја напуштат УЕФА и да се обидат да ја основаат Суперлигата.
„Тоа предизвикува непријатност кај клубовите кои не се на самиот врв“, изјави оваа недела извршниот директор на Ајнтрахт Франкфурт, Аксел Хелман.
Тој рече дека клубовите работат заедно „за зајакнување на интересите на средната класа“.
Едно од четирите дополнителни места е резервирано за шампионот во домашната лига, а преостанатото место треба да му припадне на петтопласираниот од францускиот шампионат.
Против новите предлози се и две европски навивачки здруженија. Тие бараат УЕФА да ги преиспита своите одлуки пред форматите за натпреварувањата за сезоните 2024/2027 да им бидат предадени на радиодифузерите и спонзорите.
Во соопштението на групата навивачи се наведува дека дозволата клубовите да се квалификуваат по минатите заслуги е „против самиот принцип на спортски заслуги“.
Вкупниот приход на клупските натпреварувања на УЕФА е 3,5 милијарди евра, од кои две милијарди делат 32 учесници во Лигата на шампионите. ЕЦА предвидува зголемување од речиси 40 проценти во однос на предложените формати. Хелман рече дека повеќе пари треба да се пренасочат во Лигата на Европа и Лигата на конференции.
Тие натпреварувања треба да се прошират, но ќе имаат помалку натпревари од Лигата на шампионите.
Одлуката би можела да биде донесена на маргините на финалето од Лигата на шампионите, кое ќе се одржи на 28 мај во Париз.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Заврши сезоната за Енцо Фернандес
Играчот од средниот ред на Челзи, Енцо Фернандес, ја заврши сезоната, бидејќи наскоро ќе мора да оди на операција на препоните, пишува аргентинскиот весник „Оле“. Според овој извор на Фернадес ќе му бидат потребни неколку недели за рехабилитација.
Поранешниот фудбалер на Ривер Плејт и Бенфика, извесно време се жалеше на болки, но сепак играше. Постоеше опција лекувањето да се одложи до лето, но по консултација со лекарите на Челзи и аргентинската репрезентација тој одлучи веднаш да биде опериран.
Планот е Фернандес да има доволно време целосно да се опорави за претстојната Копа Америка која започнува на 20 јуни.
Светскиот шампион пристигна на „Стемфорд Бриџ“ од Лисабон во јануари 2023 година во трансфер вреден 121 милион евра. Неговите настапи оваа сезона, сепак, се во склад со перформансите на повеќето играчи на Челзи – неубедливи и нестабилни.
Енцо оваа сезона одигра 40 од 45 натпревари за „сините“.
Спорт
Ла Лига од следната година ќе се игра во САД
Претседателот на шпанската Ла Лига, Хавиер Тебас, даде неколку интересни коментари во интервју за „Експансион“. Тамошната јавност најмногу ја коментира изјавата во која тој отворено призна дека навива за Реал Мадрид. Овој факт е познат одамна, но сега за прв пат е и јавно потврден. Тебас го откри овој детал коментирајќи ја приказната за доаѓањето на Килијан Мбапе во Реал.
Сепак, претседателот на една од најдобрите светски лиги донесе и по малку шокантна вест за сите љубители на традиционалниот фудбал. Имено, од сезоната 2025/26, некои натпревари од Ла Лига ќе се играат во Соединетите Американски Држави.
Тоа значи дека веќе следната година би можеле да го видиме првиот натпревар од шпанското првенство на американска почва.
„САД е втор најголем пазар за нас, веднаш по Шпанија. Тоа ќе ја зајакне нашата позиција таму. Другите европски лиги веќе работат таму и немаме избор, во спротивно ќе не избришат“, рече Тебас.
Инаку, уште во 2018 година имаше предлог да се игра каталонското дерби меѓу Барселона и Џирона во САД, но УЕФА го блокираше тој потег.
Спорт
Абердин ќе бара 8.000.000 фунти за Миовски
Македонскиот репрезентативец Бојан Миовски, во летниот преоден рок ќе го напушти Абердин. Шкотските медиуми пишуваат дека интерес за Македонецот покажале великаните не само на шкотскиот туку и на европскиот фудбал, Ренџерс и Селтик. Според овие извори поголем интерес постои кај „полицајците“.
Глазгов Ренџерс подолг период внимателно го следи Миовски, кој ја игра најдобрата сезона во кариерата. Во сите натпреварувања, Миовски одигра 48 натпревари, постигна 24 гола.
Цената која треба да ја издвојат заинтересираните клубови изнесува 8.000.000 фунти.
Покрај Ренџерс и Селтик, интерес за Миовски наводно има и кај Феенорд. Актуелниот освојувач на Купот на Холандија, бара замена во нападот за Мексиканецот Хименес, кој извесно е дека ќе го напушти клубот.