Фудбалерот на Олимпик Лион Хусем Ауар нема да го продолжи договорот со францускиот клуб и од лето ќе стане нов играч на Бетис, дознава специјализираниот фудбалски портал „Гол“.

Веќе подолго време се шпекулира за потенцијалното заминување на Ауар и многу клубови беа заинтересирани за неговите услуги. Медиумите во Англија пишуваа дека ќе го засилил Манчестер јунајтед на крајот од јануарскиот преоден рок, но клубот од „Олд Трафорд“, ја пополни дупката во средниот ред предизвикана од повредите со ангажманот на Марсел Забицер на шестмесечна позајмица.

„Голl,“ тврди дека Ауар ги договорил деталите за соработката со Бетис и дека ќе се пресели во Шпанија по истекот на актуелниот договор со Лион.

За 24. годишниот фудбалер беа заинтересирани Интер и Севиља, но тој реши да му се приклучи на тимот на Мануел Пелегрини.

Бетис веќе купуваше во Лион, откако го ангажираше Набил Фекир за 20 милиони евра во летото 2019 година. Офанзивниот играч за врска беше и на мета на гигантите пред да се одлучи за преселба на „Бенито Виљамарин“. Во зелено-белиот дрес досега одигра 135 пати и забележа 27 гола и 26 асистенции.

Поранешниот шампион на Италија, Сампдорија, незадржливо се движи кон Серија Б. Клубот освои само девет бода во одиграните 20 натпревари. На „Мараси“ се надеваат дека ќе опстанат, но таа задача може дополнително да им биде отежната доколку Лигата реши да ги казни.

Сампдорија се соочува со одземање бодови доколку до 16. февруари не им ги исплати заостанатите плати на играчите и вработените во клубот, пишува „Газета дело Спорт“.

Како што се наведува, Сампдорија нема исплатено плати за последните три месеци од 2022 година. За да ги подмири долговите кон играчите и вработените во клубот, Сампдорија треба да обезбеди 11 милиони евра.

„Газета дело Спорт“, наведува дека е тешко да се очекува дека Масимо Фереро, кој се уште е сопственик на поголемиот дел од акциите, ќе инвестира пари во клубот за навреме да го реши овој проблем бидејќи тоа би значело дека тој му дал на клубот финансиска „инјекција“ вредна меѓу 35 и 50 милиони евра.

Доколку платите не бидат исплатени до 16.февруари, на Сампдорија ќе и бидат одземени бодови. Овој извор не наведува колку бодови можат да му бидат одземени на клубот.

Во финалето на Лига купот, во кое Манчестер јунајтед и Њукасл ќе се борат за првиот трофеј сезонава, еден дел од трибините на Вембли ќе биде одреден за стоење. За прв пат по речиси 35 години.

Англиската фудбалска лига потврди дека Манчестер јунајтед и Њукасл ќе добијат по 867 билети за специјални нови сектори на трибините.

Секторите за стоење на англиските стадиони беа отстранети по трагедијата во Хилсборо во 1989 година кога 97 навивачи на Ливерпул трагично ги загубија животите.

За да им овозможат на навивачите да ги следат натпреварите и на овој начин, клубовите со години ги реновираат трибините за да го спроведат тоа на најсигурен можен начин.

Стадионите на Тотенхем, Кардиф, Челзи, Манчестер сити и Ливерпул имаат стоечки сектори (иако Енфилд се уште нема добиено дозвола за својот дел од трибините)…

Финалето на Лига купот е закажано за 26. февруари.