Рајо Валјекано, клубот на македонскиот репрезентативен голман Столе Димитриевски, е третиот нов шпански прволигаш за 2020/21, откако клубот од мадридските предградија успеа да направи вистински подвиг и на гости да ги победи Џирона со 2:0, по првиот меч во кој дома загубија со 1:2.

Рајо ќе се приклучи на Еспањол и Мајорка во новата сезона на Ла лига, откако тие два клуба успеаја да се пласираат како први и втори во Сегунда минатата сезона.

Алваро Гарсија во седмата минута донесе водство за Рајо, пред Оскар Трехо во финишот на полувремето да зголеми на 0:2. Ситуацијата стана критична за гостите, кога Емилијано Веласкез доби втор жолт картон, но клубот на нашиот репрезентативец успеа да изддржи за голема победа.

Додека во Европа проектот на Суперлигата беше прогласен за „мртов“ неколку дена по објавувањето во април, во Африка веќе се подготвуваат да формираат Суперлига под водство на Африканската фудбалска конфедерација (ЦАФ).

Претседателот на ЦАФ, Патрис Мотсепе потврди дека Африканската Суперлига, идеја предложена од претседателот на ФИФА, Џани Инфантино е потребниот чекор напред за богато натпреварување во Африка.

„Веќе сме во преговори за формирање на инклузивна и широка Суперлига која ќе биде под водство на ЦАФ. Го следиме примерот на дел од европските клубови за формирање на Суперлигата и нивниот неуспех и искуство“, вели Мотсепе.

Инфантино уште во 2019 предложи формирање на Суперлига во Африка со 20 постојани членови плус други кои би се квалификувале, проект што би донел околу 3 милијарди долари во петгодишниот циклус.

Норвешка нема да го бојкотира Светското првенство во Катар во 2022 (доколу успее да се квалификува), откако повиците за бојкот поради човековите права во арапската земја беа отфрлени на гласањето на Норвешката фудбалска федерација (НФФ).

На вонредниот конгрес на НФФ, 368 делегати гласаа против бојкотот, додека 121 беа за бојкотирање. Пред гласањето, од Норвешката асоцијација на навивачи (НСА) објавија дека учеството на СП би било како играње на „фудбал на гробишта“ поради големата смртност на имигрантите-работници во оваа земја.

Норвешка, која не се квалификувала на големо натпреварување од ЕП 2000, е на четвртото место во својата група во квалификациите. И покрај релативно слабите шанси за квалификување, доколку се изгласаше бојкот немаше да се играат квалификации и ќе следуваше казна од УЕФА и ФИФА.

Повиците за бојкот почнаа кога прволигашот Тромсо прв јавно проговори против кршењето на човековите права во Катар во февруари, а јавната анкета објави дека 49 отсто од Норвежаните се за бојкотирање.