Ѕвездата на Наполи, Виктор Осимен во интервју со неговиот сонародник Пол Труст-Еконг на Јутјуб зборуваше за својот пат во професионалниот фудбал, признавајќи дека бил на „дното“ во Нигерија пред да почне со фудбалот.

Нигериецот во 2020 дојде во Наполи од Лил за 70 милиони евра со што стана најскапиот африкански фудбалер во историјата.

„Тоа почна како сон, детски сон. Сакав да бидам професионалец инспириран од легенди како Дидие Дрогба, Одион Игало и Микел Оби. Мислам дека успеав во тоа, и тоа е едно од моите најголеми остварувања во животот. Кога растев чистев олуци за 20 наири (околу 2 центи) и чистев по станови и канцеларии, носев вода… Работев напорно и тие пари беа важни за мене и за моето семејство. Мојот брат продаваше весници, мојата сестра портокали. Тие работи ми помогнаа во животот и затоа сум благодарен за тоа каде сум сега, поради работите кои ме направија посилен“, вели 22-годишниот Нигериец.

Тој се пресели во Европа во 2017, кога Волфсбург потпишаа договор со него, а потоа играше во Белгија (Шарлроа) и Франција (Лил). Минатата сезона тој постигна 10 гола во 24 настапи во Серија А, а оваа сезона има фантастичен старт со 7 гола во 8 меча во сите натпреварувања.

Кристијано Роналдо не застана ниту во периодот на интернационалната пауза, постигнувајќи хет-трик против Луксембург (со два пенали) при убедливата 5:0 победа над аутсајдерот од Португалија.

Со ова тој го продолжи неговиот светски рекорд на 115 голови во репрезентативниот дрес и стана првиот фудбалер во историјата кој постигал 10 хет-трика за својата репрезентација.

Влијанието на Роналдо во светот на фудбалот е огромно, а како се чувствувале фудбалерите на Луксембург, заедно со нивниот селектор, најдобро покажува фотографијата која стана вирална на Интернет – тој во скок, и буквално сите очи вперени во него.

Големата награда на Кина, нема да се вози и во 2022 година. Рестрикциите во Кина се такви што е невозможно да се организира трка во шампионатот на Формула 1. Замена за трката која се вози во Шангај, на 24.април ќе се вози Големата награда на Емилија-Ромања, во Имола.

За разлика од Кина, се очекува по пауза од две години, во календарот да се вратат трките во Австралија, Канада, Сингапур и Јапонија. Наредната година прв пат ќе се вози трката во Мајами.

Планот на ФИА е во 2022 година да се возат 23 трки за 35 недели.

Сезоната би започнала на 20.март во Бахреин, а би завршила на 20.ноември во Абу Даби. Првенството во Формула 1 ќе заврши три недели порано, за да не се преклопи со фудбалскиот Мундијал во Катар.