Спорт
Меси немал контакти ниту со ПСЖ, ниту со Манчестер сити
Лионел Меси не контактирал со никого од Пари Сен-Жермен, Манчестер сити и ниту еден друг клуб по многубројните шпекулации околу неговата иднина и ќе почека да дојде крајот на сезоната за да одлучи дали ќе остане во Барселона или ќе замине во друг клуб, јавува порталот „Гол“, обично пристојно веродостоен околу иднината на Каталонецот (тие го имаа првото интервју по сагата со барањето за трансфер во текот на летото).
Според изворите блиски до Аргентинецот, Меси немал контакти со ПСЖ, ниту планирал да зборува со новиот тренер Маурисио Почетино, а исто така не бил во врска ниту со Пеп Гвардиола, сега менаџер на Манчестер сити и тој лично ќе одговори каде ќе ја продолжи кариерата по крајот на сезоната.
Бидејќи договорот му завршува во текот на летото, тој е слободен да преговара со сите не-шпански клубови од 1 јануари, но негов избор е да не го прави тоа. Дополнителна неизвесност носат изборите за претседател во каталонскиот клуб, но Меси и тука се обидува да биде неутрален и не разговарал со тројцата кандидати, Жоан Лапорта, Тони Фреича и Виктор Фонт.
33-годишниот Меси оваа недела пак беше во центарот на „бурата“ предизвикана од шпанскиот весник „Ел мундо депортиво“, кој објави дека неговиот четиригодишен договор потпишан во 2017 тежи неверојатни 555 милиони евра, со што тој е најплатениот спортист во историјата. Барса веќе најави тужба против весникот, но Меси и тука остана „тивок“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Тонали сега е на удар и на Англичаните поради обложувањето
Играчот од средниот ред на Њукасл, Сандро Тонали е под истрага од Фудбалската асоцијација (ФА) поради прекршување на правилата против обложување.
Италијанецот веќе отслужува 10-месечна суспензија од Италијанскиот фудбалски сојуз поради обложување за време на неговото играње за Милан.
Новите докази покажуваат дека Тонали се обложувал и кога дошол во Њукасл. Младиот 23-годишен играч го прекршил правилото дури 50 пати од 12 август до 12 октомври 2023 година.
На Тонали му е даден рок до 5 април да одговори на обвиненијата.
„Добивме потврда дека е покрената истрага. Клубот и Тонали целосно ќе соработуваат. Тоа е се што можеме да кажеме во моментов“, се вели во соопштението за медиумите на клубот.
Тонали пристигна во Њукасл минатиот јули во трансфер вреден 60 милиони фунти од Милан.
Спорт
Најдобриот судија во БиХ поради закани одби да им суди на Железничар и Сараево
Шампионатот на Босна и Херцеговина влегува во завршна фаза, а локалниот портал „Спортспорт“, пишува дека најдобриот судија, Ирфан Пељто одбил да им суди на клубовите кои доаѓаат од главниот град Железничар и Сараево) до крајот на сезоната.
Пељто тоа го направил поради наводните закани што ги добивал тој и неговото потесно семејство, кои ги пријавил во полиција. Најдобриот судија од БиХ за својата одлука го известил Судискиот комитет на Фудбалскиот сојуз на Босна и Херцеговина, кој ја прифатил неговата одлука.
Железничар и Сараево ќе одиграат неколку дерби натпревари до крајот на сезоната, но Пељто нема да суди на ниту еден од нив.
Тој требаше да биде главен судија викендов на дербито меѓу Железничар и Вележ, но главен судија на „Грбавица“ ќе биде Елведин Топузовиќ. .
Пељто гради завидна кариера на меѓународен план и често суди натпревари во Лигата на шампионите. Неодамна судеше на пријателскиот натпревар меѓу Словенија и Португалија, а претходно го судеше и натпреварот Лајпциг- Реал Мадрид.
Речиси е сигурно дека ќе суди на ЕП.
Спорт
Интер подготвува нов договор за Инзаги
Интер е апсолутен лидер во Серија А, прашање е само кога и математички ќе ја обезбеди шампионската титула, која ќе биде прва во кариерта на Симоне Инзаги. 47-годишниот тренер досега има освојувано трофеи само во Купот и Суперкупот на Италија.
Она што Инзаги го направи оваа сезона во Серија А, ги натера клупските челници да ја сменат својата стратегија и да му понудат нов договор на тренерот.
Инзаги досега двапати го продолжуваше договорот со Интер, во 2022 и 2023 година, двата пати клубот му понуди едногодишен договор. Овој пат на 47-годишниот тренер ќе му биде понуден двегодишен договор.
Во однос на претходните години, разликата е што на Инзаги ќе му биде понуден нов договор пред да заврши сезоната, а не откако таа ќе заврши.
Интер е на чекор до освојување на шампионската титула во Серија А, откако по 29 кола е прв на табелата со 76 бодови, 14 повеќе од второпласираниот градски ривал Милан.