Спорт
Наѓ: Ќе го ликвидирав Јарни, но потоа останавме добри пријатели
Поранешниот српски фудбалер, Алберт Наѓ се потсети на легендарниот меч помеѓу СР Југославија и Хрватска во квалификациите за ЕУРО 2020, објаснувајќи дека сакал да го „ликвидира“ Роберт Јарни по (не)славниот инцидент со Зора Бата Мирковиќ, кога тој го грабна за јајца.
Во првиот меч помеѓу Хрватска и СР Југославија по растурањето на поранешната СФРЈ во Загреб во 1999 година, Мирковиќ доби црвен картон по неспортскиот потег, а мечот заврши 2:2, и на крајот СР Југославија отиде на ЕП во Белгија и Холандија во 2000.
„Бата Мирковиќ тогаш испадна херој, но беше прашање што ќе се случеше доколку не влезевме на Европското првенство тогаш. Кога видов дека шпанскиот судија му покажува црвен картон, веднаш тргнав кон Јарни, ќе го ‘ликвидирав’. Цела среќа што судијата не го виде мојот бес, бидејќи и јас ќе добиев црвен. Ден подоцна се сретнавме со Јарни на аеродром и почнавме да се смееме. Тоа беше нормално, надвор од теренот бевме пријатели, а на теренот професионалци“, вели Наѓ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Познати сe полуфиналните термини во Лигата на шампионите
Пари Сен Жермен, Борусија Дортмунд, Баерн Минхен и Реал Мадрид се пласираа во полуфиналето, во Лигата на шампионите.
Познато е дека во полуфиналето ќе се сретнат Пари Сен Жермен и Борусија Дортмунд, односно Баерн Минхен и Реал.
Домаќини на првите натпревари ќе бидат германски клубови, додека реваншите ќе се играат на „Паркот на принцовите“ во Париз и на „Сантијаго Бернабеу“ во Мадрид.
Полуфиналните натпревари се закажани за 30 април и 1 мај, а реваншите на 7 и 8 мај.
Сите натпревари започнуваат во 21:00 часот.
Финалето на Лигата на шампионите е на 1 јуни на стадионот „Вембли“ во Лондон.
Спорт
Де Роси ќе ја води Рома и следната сезона
Даниеле Де Роси и следната сезона ќе остане на клупата на Рома. Поранешниот капитен ги оправда очекувањата и на навивачите и на клупските челници.
Поранешниот италијански репрезентативец, функцијата ја презеде од Жозе Мурињо, кој доби отказ во јануари по поразот од Милан (1:3).
Де Роси ја донесе Рома на петтото место на табелата, кое според сегашната ситуација треба да го одведе тимот во Лигата на шампионите, бидејќи Италија во моментов води на УЕФА рангирањето на најдобрите клубови и со тоа би добила уште едно место во елитното европско клупско натпреварување.
Исто така, Рома е и во четвртфиналето на Лига Европа, каде со Милан се бори за место меѓу најдобрите четири екипи.
„По средбата со Даниеле Де Роси, можеме да кажеме дека ќе остане со нас и следната сезона. Тој донесе позитивни промени и сакаме да продолжиме по тој пат“, изјавија газдите на Рома, Американците Ден и Рајан Фридкин.
Спорт
Судиите во Украина пред натпревар ќе одат на полиграф
Легендарниот украински фудбалер Андриј Шевченко воведува неверојатно правило во тамошниот фудбал. Судиите ќе мора да поминат на полиграф пред натпреварите. Судиите ќе бидат избрани по случаен избор, а целта на овој проект во украинскиот фудбал е да се стави крај на местењето натпревари.
Оваа информација ја пренесува италијанскиот весник „Кориере дела сера“, со образложение дека идејата на Шевченко има за цел „да ја намали корупцијата во фудбалот и да спречи местење натпревари“.
Судиите ќе мора да поминат тестирање пред натпреварите. Нешто слично како случајните допинг тестови за фудбалерите, кои се прават по натпреварите.
„Го гледаме полиграфот како шанса да добиеме повеќе информации и да разбереме кои судии можат да се справат со оваа работа, а кои не. Почнуваме од нула“, рече Шевченко, поранешен напаѓач на Милан, Челзи и Динамо Киев.