Спорт
НБА: Неверојатниот Вестбрук со нов трипл-дабл – видео
Расел Вестбрук, ѕвездата на Оклахома, уште на почетокот на сезоната ја истакна кандидатурата за МВП на сезоната. Вестбрук против ЛА Лејкерс го забележа вториот трипл-дабл, во третиот сезонски натпревар и на вечната листа се израмни со Џери Лукас, Оскар Робертсон и Меџик Џонсон.
Оклахома победи во „Стејплс Центарот“, во Лос Анџелес 113:96, а Вестбрук го предводеше тимот со 33 поени, 12 скокови и 16 асистенции. Вестбрук стана прв играч во историјата на НБА лигата, кој на првите три натпревари во сезоната имач учинок од најмалку 100 поени, 30 скокови и 30 асистенции.
Голден Стејт славеше над Феникс 106:100, а мечот го обележа довчерашниот соиграч на Вестбрук, Кевин Дурант кој постигна 37 поени.
Дурент стана првиот играч во клупската историја Голден Стејт кој на првите три средби во сезоната постигнал повеќе од 100 поени. Таков учинок пред Дурант имал само легендарниот Вилт Чембрлен во сезоната 1959/1960.
Покрај Дурант, кај вицешампионот се истакнаа и Стеф Кари со 28, односно Клеј Томпсон со 14 поени.
Уште еден играч игра брилијантно од почетокот на сезоната, тоа е најдобриот дефанзивец во лигата Кавај Ленард. Сан Антонио победи во Мајами 106:99, а Ленард постигна 27 поени и имаше 15 скокови. Пау Гасол исто така имаше двоен ефект од 20 поени и 11 скокови.
Мајами го предводеа Хасан Вајтсајд (27 поени, 15 скокови) и Горан Драгиќ (25 поени).
Хјустон и Далас го одиграа првото сезонско дерби на Тексас, кое го реши Џејмс Харден со поените од линијата за слободни фрлања постигнати во последната секунда. Во триумфот 93:92, Харден постигна 28 поени.
Резултати од другите натпревари: ЛА Клиперс-Јута 88:75, Детроит-Милвоки 98:83, Мемфис-Вашингтон 112:103. крај/мф/нц
Се вчитува прикажувачот на видео…
Извор: макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Првиот спринт во сезоната за Ферстапен, Хамилтон втор
Возачот на Ред Бул, Макс Ферстапен, триумфираше на првата спринт трка во сезоната, која се возеше како дел од Големата награда на Кина, петта трка од овогодинешниот шампионат во Формула 1.
Трикратниот светски шампион славеше со повеќе од 13 секунди предност пред Луис Хамилтон од Мерцедес, додека на третото скалило на подиумот се најде вториот возач на Ред Бул, Серхио Перез.
Од пол-позицијата стартуваше Ландо Норис во Мекларен, кој веднаш беше предизвикан од агресивниот Хамилтон, кој не му даде простор да остане во водство. И додека седумкратниот светски шампион го презеде водството, помладиот од двајцата Британци отиде широко и падна на седмото место, додека Хамилтон го следеа Алонсо и Ферстапен.
Бранителот на титулата најпрвин го стигна, а потоа во седмиот круг и го престигна Шпанецот, а два круга подоцна го презеде водството, откако Хамилтон практично не се бранеше, а потоа лесно се одлепи.
Возачот на Мерцедес исто така немаше конкуренција во борбата за второто место, но зад него се одвиваше голема борба за третата позиција. Алонсо најпрво беше предизвикан од Карлос Саинц Јуниор, но возачот на Астон Мартин се бранеше агресивно, што го искористи Перез и ги претекна двајцата.
Во еден момент дојде и до контакт меѓу двајцата Шпанци, поради што Алонсо мораше да се повлече од трката, а потоа дојде до борба меѓу Саинц и неговиот тимски колега Шарл Леклер.
На тој дуел имаше доста искри, а Леклер успеа да се снајде подобро и да стигне до четвртото место со две секунди зад Перез. Саинц беше три секунди поназад, пред Норис и Оскар Пјастри и Џорџ Расел во вториот Мерцедес, кој го освои последниот поен.
Во генералниот поредок сега води Ферстапен со 85 бодови, 15 повеќе од Перез, додека Леклер е трет со 64.
Спорт
Драконска казна во Холандија – клуб исфрлен од првата лига
На фудбалскиот клуб Витезе му беа одземени 18 бодови, по што и официјално испадна од првата холандска лига, соопшти Фудбалскиот сојуз на Холандија (КНВБ).
„Независниот комитет за лиценцирање на КНВБ му изрече санкција на Витезе од минус 18 бодови. Клубот од Арнем ја доби оваа казна затоа што повеќепати не ги исполнуваше барањата од прописите за лиценцирање играчи во подолг временски период“, се вели во соопштението на КНВБ.
Витезе сега има минус еден бод и автоматски го загуби прволигашкиот статус на четири кола пред крајот на првенството.
Најголемиот успех во историјата клубот од Арнем го постигна во сезоната 2016/17 кога го освои Купот на Холандија.
Последен пат Витезе играше во Европа во сезоната 2021/22, кога беа елиминирани од подоцнежниот освојувач Рома во осминафиналето на Конференциската лига.
Спорт
Бакс без Јанис во првото коло од плеј-офот
Милвоки Бакс се соочува со значителен проблем пред почетокот на плеј-оф серијата во која ривал ќе им биде Индијана Пејсерс. Бакс нема да може да смета на Јанис Адетокумбo.
Како што пренесе Шамс Чаранија, Адетокумбо ќе мора да паузира од две до четири недели поради повредата на потколеницата со која се здоби на натпреварот против Бостон Селтикс.
Овие првични проценки за повреди секако значат дека Адетокумбо сигурно ќе го пропушти првото коло од плеј-офот и натпреварите со Индијана.
Плеј-офот за Бакс започнува ноќта помеѓу недела и понеделник, а тие се домаќини во првиот натпревар.