Спорт
НЕ Е СОН: Македонија ја елиминира Италија и оди во финале против Португалците
Топспорт во Палермо,
Никола Ѓуровски
Фудбалската репрезентација на Македонија го елиминира европскиот првак Италија (0:1) во баражот за пласман на Светското првенство во Катар. Херој е Александар Трајковски кој постигна во 90.минута. Одиме во финале, против Португалија во Порто, на чекор до мундијалот.
Италија нападна од стартот, а Македонија создаде блок пред голот на Столе Димитриевски. Имаше и грешки, но во глобала функционираше добро.
По половина час дојде најсериозната опасност за Италија, и тоа по грешка на Столе Димитриевски. Македонскиот голман сакаше да додаде во средината, но топката стигна до Доменико Берарди, кој беше во одлична шанса. Тој шутираше кон празниот гол, но Столе Димитриевски успеа да ја исправи грешката и го одбрани ударот.
Дарко Чурлинов во 39.минута украде топка од дефанзибците на Италија, тргна сам кон голот на Донарума, но не издржа во спринтот и Флоренци стигна да ја одземе топката.
Во 45.минута, Македонија го упати првиот директен удар кон голот на Донарума. Барди го проигра Трајковски, кој шутираше од 20 метри, но Донарума одбрани.
„Инвазијата“ на Италија продолжи и во второто полувреме. Берарди беше најактивен. Се закани со два удари откосо од десната страна, а во 64.минута имаше одлична шанса, но во последен момент блокираше Алиоски.
Емерсон силно шутираше од 18 метри во 79.минута, но над голот на Македонија.
И дојдоа последните пет минути. Продолжение. Александар Трајковски шутира од 25 метри и го совлада Џанлуиџи Донарума.
БАРАЖ ЗА СП ВО КАТАР
ИТАЛИЈА – МАКЕДОНИЈА 0-1 (0-0)
Стадион „Ренцо Барбера“ во Палермо. Судија: Клемон Турпан (Франција). Стрелец. Трајковски 90′ (Македонија). Ж.картони: Велковски (Македонија).
ИТАЛИЈА: Донарума, Флоренци, Мансини (89′ Кјелини), Бастони, Емерсон, Жоргињо, Верати, Барела (78′ Тонали), Берарди (89′ Жоао Педро), Имобиле (78′ Пелегрини), Инсиње (64′ Распадори).
МАКЕДОНИЈА: Димитриевски, С. Ристовски, Велковски (86′ Ристевски), Муслиу, Алиоски, Адеми (60′ Спировски), Николов (60′ Ашковски), Барди, Чурлинов, М. Ристовски (72′ Миовски), Трајковски.
Графика: Sofascore за Топспорт.мк
Trajkovski golpea al minuto 93 e Italia afuera del mundial.
pic.twitter.com/PcE9Ru8RuS— Fútbol Vertical (@futbol_vertical) March 24, 2022
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Богдановиќ и Мареј ги срушија Бостон Селтикс
Атланта Хокс по едно продолжение ги победија Бостон Селтикс со 123:122. Богдан Богдановиќ и Дежонте Мареј му пресудија на лидерот во НБА лигата. Првиот погоди два пати во финишот на регуларниот дел, а вториот ги постигна сите поени за Атланта во продолжението.
Атланта Хокс ја забележаа четвртата последователна победа во НБА лигата, а капитенот на српската репрезентација, со две последователни тројки им овозможи на домаќините продолженијата.
Богдановиќ за 43 минути игра имаше 24 поени (9/19 од поле, 2/8 за три, 4/4 од поле), седум скока и пет асистенции.
Атланта до победата ја предводеше Дежонте Мареј со рекорд во кариерата од 44 поени, за што му беа потребни дури 44 шута кон кошот на Бостон.
Тој ги постигна поените за победа на 0,1 секунда пред крајот на продолжението. Мареј беше единствениот играч на Хокс кој постигна поени во продолжението.
Тој имаше и седум скока, седум асистенции и две украдени топки. Коби Брајант и Расел Вестбрук се единствените играчи кои имаат повеќе шутеви од игра од Мареј во последните 20 сезони.
Брајант имаше шест натпревари со најмалку 44 шута. Толку такви настапи имаше Рик Бери, а четири Елгин Бејлор. Апсолутен рекордер е Вилт Чембрлен со дури 58 натпревари. За илустрација Мајкл Џордан само еднаш во кариерата на еден натпревар 44 пати шутирал кон кошот на противникот.
Инаку, Мареј имаше повеќе шутеви на овој натпревар отколку првите ѕвезди на Селтикс Џејсон Тејтум (22) и Џејлен Браун (17) заедно.
Кај Хокс уште се истакнаа и Деандре Хантер со 21 поен и 13 скока и Клинт Капела, кој додаде 12 поени и 13 скока.
Во тимот на Бостон Џејсон Тејтум постигна 31 поен со 13 скока и пет асистенции, Дерик Вајт додаде 22 поени, седум скока и пет асистенции, а Кристапс Порзингис имаше 20 поени и седум скока.
Бостон е најдобриот тим во НБА со 57 победи и 16 порази и го обезбеди првото место пред плеј-офот во Источната конференција.
Со 34 победи и 39 порази, Атланта е на 10. место кое води во плеј-ин.
Спорт
Поранешниот селектор на Кина призна дека примил 10 милиони евра мито
Поранешниот селектор на фудбалска репрезентација на Кина, Ли Те, во случајот со пред судот, во процесот што се води против него, признал дека примил повеќе од 10 милиони евра мито.
Ле, кој ја водеше Кина од јануари 2020 до декември 2021 година е обвинет за давање и примање мито и учество во местење натпревари, се вели во соопштението за медиумите на провинцискиот суд во Хубеи.
Во текот на повеќемесечниот процес, Ле призна дека добил повеќе од 9,8 милиони евра во периодот од 2017 до 2021 година.
„Ли Те ја призна вината и изрази каење“, се вели во соопштението на судот и се додава дека пресудата ќе биде објавена подоцна.
Кинеските медиуми во вторникот објавија дека поранешниот претседател на кинеската фудбалска федерација Чен Џујуан, кој призна дека примал мито, е осуден на доживотен затвор.
Спорт
Хенес: Алонсо нема да дојде во Баерн ова лето
Почесниот претседател на Баерн, Ули Хенес изјави дека минимални се шансите тренерот на Баер Леверкузен, Чаби Алонсо на крајот на сезоната да го преземе клубот од Минхен.
Баерн пред нешто повеќе од еден месец објави дека тренерот Томас Тухел ќе ја заврши својата мисија во Минхен на крајот од сезоната.
„Точно е дека сакаме да потпишеме договор со Алонсо. Сепак, ќе биде многу тешко, да не речам невозможно“, изјави Хенес.
Алонсо го презеде тимот од Леверкузен во октомври 2022 година, а оваа сезона е вистински хит во Бундеслигата.
„Сигурен сум дека Алонсо ќе остане во Баер за да ја продолжи својата работа. Сега е тренер на клуб кој е блиску до освојување на титулата во Бундеслигата. Тој треба да му биде благодарен на клубот, но и клубот има за што да му заблагодари“, додаде Хенес.
Од 2014 до 2017 година, Алонсо играше за Баерн Минхен, каде што разви одлични односи со луѓето од клубот, меѓу кои и тогашниот претседател Ули Хенес, кој сега е доживотен почесен претседател.