Голманот на Зеленортските Острови, Жозимар Жозе Евора Дијаш – Возиња, преку ноќ стана една од најголемите ѕвезди на Светското првенство по сензационалното реми без голови против Шпанија.

Најзаслужен за освоениот бод беше токму 40-годишниот чувар на мрежата, кој со неколку извонредни интервенции ги спречи Шпанците да стигнат до победа.

Неговите одбрани предизвикаа огромно внимание кај љубителите на фудбалот ширум светот, па илјадници навивачи почнаа да го следат на Инстаграм. На национална телевизија дури бил упатен повик до гледачите да го заследат Возиња како признание за неговиот настап.

По натпреварот, додека давал изјава за бразилска телевизија, водителка му покажала колку следбеници добил за само неколку часа. Возиња останал видно изненаден од бројките.

Пред натпреварот имал околу 50.000 следбеници на Инстаграм, а по ремито со Шпанија бројката пораснала на околу 2 милиони.

Возиња сè уште не се огласил на социјалните мрежи, но неговата популарност продолжува да расте, а секоја негова наредна објава веројатно ќе привлече рекорден број реакции и прегледи.

Ниту Лионел Меси, ниту Ламин Јамал, ниту Ерлинг Холанд, ниту Рафиња… најголемата сензација на почетокот на Светското првенство е 40-годишниот голман на Зеленортските Острови, Жозимар Жозе Евора Дијаш, попознат како Возиња.

Во моментот кога Шпанија го започна својот натпревар против Зеленортските Острови, малкумина очекуваа дека еден од главните херои ќе биде голман кој настапува во втората португалска лига, пишува „Телеграф“.

Возиња го претвори дуелот со европскиот шампион во своја лична приказна која за кратко време го обиколи светот. Притоа постави и рекорд.

„Голманот на Зеленортските Острови, Возиња, на 40-годишна возраст стана најстариот голман кој успеал да ја сочува мрежата недопрена на своето деби на Светско првенство, запишувајќи седум одбрани против Шпанија“, објави статистичката агенција Опта.

Иако има 40 години и брани во втората лига на Португалија, против еден од фаворитите за титулата изгледаше како голман од највисока светска класа. Неговите интервенции, сигурноста и смиреноста меѓу стативите го претворија во еден од најзабележителните играчи на натпреварот и најголемата пречка за шпанските напаѓачи.

Зошто го викаат Возиња?

Прекарот „Возиња“, што во превод значи „Глас“, го следи уште од детството на островот Сао Висенте.

Според податоците на ФИФА, неговиот фудбалски пат е далеку од вообичаен. Кариерата ја градел во помалку познати средини, меѓу кои Ангола и Португалија, а токму упорноста му овозможила на 40-годишна возраст да застане на голот во најважниот натпревар во кариерата.

„Прекарот е поврзан со моите баби и дедо. Никогаш не живеев со родителите. Кога се родив, татко ми беше на воена служба, а мајка ми мораше многу да работи, па растев со бабите и дедо ми“, изјавил Возиња за ФИФА.

Неговото прво заминување од татковината било во Ангола, каде што настапувал за клубот Прогресо. Со себе го понел и прекарот по кој денес е препознатлив низ целиот свет.

„Во Зеленортските Острови никој не ме знаеше под тоа име. На почетокот не ми се допаѓаше, дури и се лутев поради тоа“, раскажал тој.

„Кога пристигнав во Ангола, во тимот имаше уште еден голман по име Жозимар. Тогаш реков дека не сакам да носам дрес со натпис Жозимар II. Ако во Зеленортските Острови сите ме знаат како Возиња, тогаш така и ќе остане.“

Дебитираше за репрезентацијата во 2012 година

За националниот тим на Зеленортските Острови дебитирал во 2012 година и оттогаш има повеќе од 80 настапи.

Бил дел од репрезентацијата на неколку изданија на Африканскиот куп на нации – во 2013, 2015, 2021 и 2023 година.

Во 2026 година го запиша и својот прв настап на Светско првенство, што претставува историски момент и за него и за неговата земја.

По ремито со Шпанија, Возиња стана една од главните теми на социјалните мрежи. Еден од најсподелуваните коментари најдобро го опишува неговиот настап:

„Европскиот шампион не можеше ништо против Возиња.“

И навистина, против Шпанија тој делуваше како непробоен ѕид, поради што неговото име веќе се вбројува меѓу најубавите приказни на Светските првенства.

Повикот за репрезентацијата го добил преку социјалната мрежа LinkedIn додека работел како банкар во Даблин, а денес поранешниот ирски службеник Роберто Лопес Пико ремизираше со Шпанија на Светското првенство, настапувајќи за малата островска држава Зеленортски Острови, оддалечена речиси 5.000 километри од неговиот роден град. Неговата неверојатна приказна е само дел од фудбалската бајка на дебитантите на Мундијалот, пишува BBC.

Од банкарски службеник до фудбалска ѕвезда

„Не уживав во таа работа“, изјавил 33-годишниот Лопес за својот поранешен канцелариски живот, присетувајќи се на необичниот пат од службеник во Ирска до репрезентативец на Зеленортските Острови на нивното прво Светско првенство.

Дефанзивецот, познат по прекарот Пико, пред десет години штотуку стекнал квалификација за хипотекарен советник и паралелно играл за Бохемианс во ирската лига.

Во 2017 година добил понуда од дублинскиот ривал Шамрок Роверс да ја напушти секојдневната работа и целосно да се посвети на професионалниот фудбал. За одлуката не зажалил.

Денес беше дел од почетниот состав на Зеленортските Острови. Поранешниот младински репрезентативец на Ирска дебитирал за „Сините ајкули“, како што гласи прекарот на репрезентацијата на Зеленортските Острови, во 2019 година.

Тогашниот селектор Руи Агваш стапил во контакт со него преку професионалната мрежа LinkedIn, откако дознал дека таткото на Лопес, Карлос, потекнува од Зеленортските Острови – држава составена од десет острови во Атлантскиот Океан, крај западниот брег на Африка.

Повик преку LinkedIn

Лопес, кој и денес настапува за Шамрок Роверс, првата порака од поранешниот напаѓач на Бенфика, напишана на португалски јазик, случајно ја игнорирал.

„Мислев дека е спам и не обрнав внимание“, изјавил за BBC Sport.

„Потоа, околу девет месеци подоцна, повторно ми испрати порака со прашање: ‘Здраво Роберто, дали успеа да размислиш за она што ти го пишав?’“

„Ми беше многу непријатно што не сум му одговорил со месеци. Ја копирав пораката, ја ставив на Google Translate и во суштина пишуваше: ‘Бараме нови играчи за репрезентацијата на Зеленортските Острови. Дали би сакал да играш за нас?’“

„Бев апсолутно воодушевен. Помислив: ‘Да, сто проценти сакам да бидам дел од овој тим.’“

Тоа бил почетокот на необичната приказна на Лопес, кој во последните седум години е стандарден првотимец на „Сините ајкули“.

Настапот на Зеленортските Острови на Светското првенство 2026, каде што во групата ќе играат и против Саудиска Арабија и Уругвај, е една од најубавите приказни на турнирот.