Атлетико Мадрид одигра само 1:1 на гости кај Реал Бетис, за да остане на првото место во Ла лига, но сега првите три клуба на табелата се одделени со само два поени на осум кола пред крајот на сезоната, најавувајќи супер-интересна борба за трофејот.

Акцијата во мечот беше ограничена на првите 20 минути игра на „Бенито Вилјамарин“, откако прво Јаник Караско уште во петтата минута ги донесе гостите во водство, но 15 минути подоцна Кристијан Телјо израмни на 1:1. Двата клуба беа израмнети во остатокот од мечот, но не успеаја да најдат решение за голманите и одбраната.

Тимот на Диего Симеоне останува лидер во Шпанија, но откако имаа само две победи во последните шест меча, сега имаат 67 поени, само еден поен повеќе од градскиот ривал Реал Мадрид, кој пак по победата на саботното „Ел класико“ има уште еден поен предност пред Барселона. Веќе четвртопласираната Севилја е на дистанца – има 58 поени. Бетис, пак, се шести со 47 поени.



Аталанта имаше убедливи 0:2 по 45 минути игра, но на крајот и беше потребен гол од пенал за да стигне до 3:2 победа на гости кај Фиорентина за да се врати на четвртото место во Серија А.

Дуван Запата беше фантастичен во првото полувреме, постигнувајќи два гола во 13. и 40. минута, но во второто полувреме на сцена стапи фантастичниот Србин, Душан Влаховиќ, кој направи целосен пресврт за помалку од десет минути, постигнувајќи голови во 57. и 66. минута.

Сепак, во 70. минута беше досуден пенал за гостите, кој Јосип Иличиќ сигурно го реализираше за нова победа на клубот од Бергамо. Аталанта сега има 61 поен, еден поен помалку од третопласираниот Јувентус и два пред Наполи во интересна битка за место кое води во Лигата на шампионите. Фиорентина се наоѓаат на 15. место со 30 поени.

Арсенал ја прекина низата од два меча без победа со 0:3 триумф кај Шефилд јунајтед, последнопласираниот клуб во Премиер лигата, за повторно да се вратат во горната половина од англиската табела.

Тимот на Микел Артета беше многу критикуван поради неефикасноста, недисциплинираноста и слабите резултати, но на „Брамал лејн“ овојпат не дозволија никакви изненадувања. Александер Лаказет во 33. минута ги донесе гостите во водство, пред Габриел Мартинели да ја смести топката во мрежата по грешката на одбраната на Шефилд во 72. минута. Лаказет го постигна својот втор гол во 85. минута за убедлива победа.

Арсенал се на деветтото место на табелата со 45 поени, огромни 10 поени зад клубовите од топ 4, додека Шефилд јунајтед се убедливо последни и практично второлигаш со само 13 освоени поени во 2020/21.