Спорт
Почина српската фудбалска легенда Владица Поповиќ, човекот кој го одби Ескобар
Легендата на Црвена звезда, Владица Поповиќ почина на 85 години во понеделникот навечер во Белград, потврдија од српскиот клуб.
Поповиќ е на петтото место на вечната листа по настапи за Звезда, откако во 499 натпревари од 1953 до 1965 година постигнал 38 гола. Со „црвено-белите“ тој освои пет титули на Југославија и три Купови, а играше и за Штутгарт, завршувајќи ја кариерата во Венецуела во тимот на Депортиво Канаријас. За поранешна СФРЈ тој настапи 20 пати и играше на Светското првенство во Чиле во 1962 година.
По фудбалската кариера, тој беше тренер во Боливија и во Колумбија, а потоа се врати во Црвена звезда во сезоната 1991/92, освојувајќи ја титулата светски шампион со победата над Коло Коло.
Тој освои титули со два различни клуба од Колумбија, Санта Фе во 1971 и Депортиво Кали во 1974 и подоцна призна дека го одбил нарко-босот Пабло Ескобар да го преземе неговиот тим Атлетико Насионал од Меделјин.
„Ме повика Пабло Ескобар, а тогаш таму сите знаеја кој е тој и дека не смееш да го одбиеш. Ме однесе во неговата вила и ми даде виски додека седевме во базен. Бараше да станам тренер, но го одбив. Знаев дека не смеам да му кажам дека ќе размислам, бидејќи тоа ќе значеше дека сум кажал да“, се потсети години подоцна Поповиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Димитров го растури Алкараз во Мајами
Григор Димитров го победи Карлос Алкараз со 6:2, 6:4 во четвртфиналето на Мастерсот во Мајами. Ова беше петти меѓусебен дуел на Бугаринот и Шпанецот и втора победа по ред за Димитров.
„Направи да се чувствувам како да имам 13 години“ – го опиша Карлос Алкараз поразот од Бугаринот
„Не се сеќавам некој да ме натерал да се чувствувам вака. Вакво нешто одамна не ми се случило. Не знаев што да правам. Барав решенија, но тој не ми даде. Почувствував неверојатна фрустрација.“
А 32-годишниот Димитров навистина одигра перфектно. Мечот го заврши со 24 винери.
„Генијалноста е често во едноставноста. Знаев дека морам да бидам поагресивен, да ги водам поените. Против него е многу тешко да се направи тоа“ – објасни Бугаринот како го победи шампионот на Индијан Велс.
Можеше и побрзо да победи бидејќи водеше со 4:1 во вториот сет, но потоа Алкараз успеа да врати еден брејк, но не успеа да се врати во мечот.
Спорт
Тонали сега е на удар и на Англичаните поради обложувањето
Играчот од средниот ред на Њукасл, Сандро Тонали е под истрага од Фудбалската асоцијација (ФА) поради прекршување на правилата против обложување.
Италијанецот веќе отслужува 10-месечна суспензија од Италијанскиот фудбалски сојуз поради обложување за време на неговото играње за Милан.
Новите докази покажуваат дека Тонали се обложувал и кога дошол во Њукасл. Младиот 23-годишен играч го прекршил правилото дури 50 пати од 12 август до 12 октомври 2023 година.
На Тонали му е даден рок до 5 април да одговори на обвиненијата.
„Добивме потврда дека е покрената истрага. Клубот и Тонали целосно ќе соработуваат. Тоа е се што можеме да кажеме во моментов“, се вели во соопштението за медиумите на клубот.
Тонали пристигна во Њукасл минатиот јули во трансфер вреден 60 милиони фунти од Милан.
Спорт
Најдобриот судија во БиХ поради закани одби да им суди на Железничар и Сараево
Шампионатот на Босна и Херцеговина влегува во завршна фаза, а локалниот портал „Спортспорт“, пишува дека најдобриот судија, Ирфан Пељто одбил да им суди на клубовите кои доаѓаат од главниот град Железничар и Сараево) до крајот на сезоната.
Пељто тоа го направил поради наводните закани што ги добивал тој и неговото потесно семејство, кои ги пријавил во полиција. Најдобриот судија од БиХ за својата одлука го известил Судискиот комитет на Фудбалскиот сојуз на Босна и Херцеговина, кој ја прифатил неговата одлука.
Железничар и Сараево ќе одиграат неколку дерби натпревари до крајот на сезоната, но Пељто нема да суди на ниту еден од нив.
Тој требаше да биде главен судија викендов на дербито меѓу Железничар и Вележ, но главен судија на „Грбавица“ ќе биде Елведин Топузовиќ. .
Пељто гради завидна кариера на меѓународен план и често суди натпревари во Лигата на шампионите. Неодамна судеше на пријателскиот натпревар меѓу Словенија и Португалија, а претходно го судеше и натпреварот Лајпциг- Реал Мадрид.
Речиси е сигурно дека ќе суди на ЕП.