УФЦ легендата Џон Џонс бил уапсен во петокот наутро, неколку часа откако беше примен во Куќата на славните на УФЦ во Лас Вегас.

Во 5.45 часот наутро по локално време, полицијата го уапсила Џонс со две обвинувања – домашно насилство и манипулирање на патничко возило. Деталите околу апсењето не се познати, но се верува дека тој уште утре ќе се појави пред суд.

34-годишниот Џонс е познат по неговите конфликти со законот. Во 2012 година тој избегна затворска казна за возење под дејство на алкохол, кога го судри своето Бентли во бандера. Во април 2015 година, повторно проблеми со возилата – Џонс удри автомобил со бремена жена и избега, по што ја загуби УФЦ титулата. Тој и тогаш избегна затворска казна, но отслужи 18 месеци условна казна. Во септември 2019 година, тој беше обвинет откако удрил келнерка во еден стриптиз бар.

Низата од 21 конкурентен меч за Баерн Минхен во кој постигнал гол, конечно, заврши за Роберт Левандовски, но неговиот тим стигна до рутинска 3:1 победа кај Гројтер Фирт за петта победа во низа во Бундеслигата.

Левандовски не успеа да го најде патот до голот, за првпат од 11 февруари да не постигне гол за Баварците, но за среќа тука беа неговите соиграчи.

Томас Милер уште во 10. минута ги донесе гостите во водство, пред Џошуа Кимих во 31. минута да зголеми на 0:2. Проблеми за тимот на Јулијан Нагелсман предизвика црвениот картон на Бенжамин Павар во 48. минута, но во 68. минута тие поведоа со 0:3 по автоголот на Гризбек. Седрик Итен во 88. минута го постави конечниот резултат 1:3.

Француската тенисерка Ализе Корне неодамна ја објави својата автобиографија, во која имаше интересен осврт на светскиот рекет број 1, Новак Ѓоковиќ, и како тој ѝ помогнал во кариерата на необичен начин.

34-годишниот српски тенисер, слично како неговите вечни ривали Роџер Федерер и Рафаел Надал, посветува огромно внимание на своето физичко здравје и форма, но за разлика од нив, тој практикува и поинакви методи. Корне објаснува една од овие методи.

„Кога слушнав дека Новак Ѓоковиќ неколкупати ја споменува медитацијата, си кажав можеби е време и јас да пробам. Секогаш сум ја имала таа страна на карактерот, пишував дневник од мојата осма година и пишував поезија. Медитацијата ти помага да се опуштиш, да ги надминеш тешките моменти што ги има во животот на секој спортист. И не сум единствената што се обиде со медитацијата по коментарите на Новак“, пишува Корне.