Девојката на Борис Бекер, Лилијан де Карваљо Монтеиро, како и најстариот син на германската тениска легенда, беа на трибините на Вимблдон поддржувајќи го Новак Ѓоковиќ во првото излегување во јавноста откако Бекер беше осуден на затворска казна за измама.

54-годишниот Бекер беше осуден за криење на 2.5 милиони фунти за да избегне да плати долгови по неговото банкротирање во 2017 година, и беше осуден на двеиполгодишна казна затвор во април.

Посетата на мечот на Ѓоковиќ доаѓа како израз на мала благодарност кон српскиот тенисер, кој работеше со Бекер како тренер повеќе од три години, а по затворањето на Германецот, се понуди за било каква помош на Ноа и на целото семејство Бекер.

Барселона преку соопштение се закани дека ќе ја тужи Рома барајќи отштета за нивното откажување на учеството на Гампер трофејот, традиционалниот меч за стартот на сезоната на каталонскиот клуб.

Пријателскиот меч вообичаено е првиот на „Ноу Камп“ за каталонскиот клуб, и овојпат поканети беа Рома за меч на 6 август, кој би вклучувал и дуел на женските екипи на двата клуба. Но, Рома, објави дека се повлекува поради „потреба за менување на планот за летните пријателски мечеви“ за да се влезе во новата сезона со максимална подготвеност. Оваа одлука наиде на бес во Барселона.

„Барселона објавуваат дека Рома еднострано, без причина реши да се повлече од договорениот меч од Жоан Гампер трофејот на 6 август. Клубот работи на пронаоѓање на нови противници, а легалниот тим на клубот ја разгледува можноста за барање на отштета за Барселона и навивачите поради оваа неоправдана одлука“, се вели во објавата на Барса.

Хрватскиот ветеран Дејан Ловрен во интервју за руската „Мач ТВ“ признава дека на негова „сметка“ имало многу критику по одлуката да остане во Зенит Санкт Петерсбург и покрај руската инвазија на Украина.

Поранешниот фудбалер на Ливерпул во интервјуто јасно зборува дека се чувствува добредојдено во Русија и дека планира да ги тужи тие во Хрватска кои го обвинувале.

„Воопшто не се двоумев дали ќе се вратам во Русија, иако Зенит нема да игра во европските натпреварувања. Не ја сфаќам таа одлука, бидејќи спортот и политиката треба да биат независни, а сега многу спортисти се неправедно казнети. Дури и параолимпијците, кои цел живот работеа на тоа да одат на Олимпијадата. Се работи за двојни станарди, но тоа не можеме да го смениме. Мораме да бидеме посилни оваа сезона. Имам тригодишен договор и планирам да го исполнам“, вели Ловрен.

За пораките од Хрватска, тој е јасен.

„Ситуацијата е тешка и за мене. Имаше голем притисок кон мене и некои луѓе сакаа да заминам. Не ми се допаѓа тоа. Немам ништо против Русија, тука супер ме примија и имам одлични пријатели. Секогаш сум прифаќал критики, но овојпат се премина кон непочитување лично кон мене и моето семејство. Има граница во тоа што ссмее да се изјави и затоа ќе одам на суд. Ако победам, ќе ги дадам парите на тие на кои навистина им се потребни“, вели Ловрен