Јулијан Нагелсман, експресно ги демантира шпекулациите дека по завршувањето на сезоната, ќе го наследи Ханси Флик, на кормилото на Баерн Минхен.

Германските медиуми, по синоќешната елиминација на Баерн од Лигата на шампиони, тврдат тренерот Флик ќе замине, поради недоразбирањата што ги има со спортскиот директор, Хасан Салихамиџиќ. Според нив главен кандидат за нов тренер на Баерн е акуелниот тренер на Лајпциг.

„Никакви преговори не водам со Баерн Минхен. Истото можам да го кажам и за моите менаџери. На таа тема не сум разговарал со клубот, бидејќи нема за што да се разговара. Договорот ме врзува за Лајпциг до 2023 година“, рекол Нагелсман.

Новак Ѓоковиќ избори пласман во третото коло на Мастерсот во Монте Карло. Во својот прв меч, по пауза од седум недели, Ѓоковиќ за 95.минути, го победи младиот Италијанец, Јаник Синер со 6/4, 6/2.

Ѓоковиќ успешно се справи со 19-годишникот, на кого му предвидуваат блескава кариера. Дека не е импресиониран од својот идол, Синер, покажа во третиот гем, кога направи брејк и поведе со 2:1.

Од тој момент, Ѓоковиќ го крена нивото на својата игра, освои четири гема, дојде до предност 5:2, а кога сервираше за првиот сет Синер успеа да му го одземе сервисот. На крајот Ѓоковиќ сепак го освои сетот со 6/4.

Во вториот сет немаше никаква неизвесност, Ѓоковиќ дојде до 4:1, а во осмиот гем, на сервис на противникот, го заклучи мечот, искористувајќи ја третата меч топка.

Ѓоковиќ, во третото коло, ќе игра против победникот од Мајами, Роберт Фуркаш или Даниел Еванс.

Покрај Ѓоковиќ, во два сета, втората рунда ја минаа упте и Андреј Рубљов, Давид Гофан, Филип Крајиновиќ, Каспер Руд и Кристијан Гарин.

Претседателот на Наполи, Аурелио Де Лаурентис, незадоволен од распределбата на приходите од телевизиските права, се заканил дека ќе го прекине првенството. Контроверзниот бизнисмен, од Фудбалскиот сојуз на Италија, побарал итно враќање на навивачите на стадионите.

„Се ќе падне во вода доколку не ги вратиме навивачите. ќе ве блокирам и ќе ве тужам“, рекол Де Лаурентис на Собранието на Фудбалскиот сојуз на Италија.

Трибините на стадионите во Италија се празни од март минатата година, кога започна пандемијата на коронавирусот. До крајот на сезоната во Серија А останаа уште осум кола.

Инаку, министерот за спорт во италијанската влада, Габриеле Гравина, пред неколку дена одобри да се отвори една четвртина од капацитетот на „Олимпико“, за ЕУРО 2020.