Спорт
Роналдо признава: Зидан ме правеше да се чувствувам посебен
Кристијано Роналдо можеби се подготвува да ја стартува втората професионална сезона како фудбалер на Јувентус, но открива дека неговиот поранешен тренер во Реал Мадрид, Зинедин Зидан го правел да се чувствува „посебен“, фалејќи ги квалитетите на Французинот како фудбалски тренер.
Роналдо си замина од Реал пред минатата сезона со договор од 100 милиони евра во Јувентус по освојувањето на трите титули во низа од Лигата на шампионите под водство на Зидан. Освојувачот на пет „златни топки“ додека беше на „Бернабеу“ во интервју за „ДАЗН“ открива што значи Французинот на тренерската позиција.
„Самодовербата која му е потребна на секој фудбалер не доаѓа само од себе, туку и од фудбалерите со кои се игра и секако, тренерот. Мораш да се чувствуваш дека си дел од важна група и Зидан ме направи да се чувствувам посебно. Ми помогна многу. Имав респект за него и претходно, но работата со него ме направи да го ценам уште повеќе. Поради начинот на кој зборува, на кој го води тимот, на кој се однесуваше кон мене. Секогаш кажуваше: ’Крис, опушти се и играј ја твојата игра, ти си тој кој ќе направиш разлика’. Секогаш беше искрен со мене и секогаш ќе го почитувам поради тоа“, вели Роналдо.
Зидан се врати во Реал Мадрид во март откако си замина по финалето од ЛШ во 2018 и победата над Ливерпул. По него тренери беа Хулен Лопетеги и Сантијаго Солари, а Реал имаше лоша сезона во Ла лига и во Лигата на шампионите. Роналдо ја освои италијанската титула со Јувентус, но исто така „падна“ во ЛШ во четврт-финалето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
УЕФА го суспендира Емилијано Мартинез
Голманот на Астон Вила, Емилијано Мартинез, поради суспензија ќе го пропушти првиот полуфинален натпревар од Конференциската лига против Олимпијакос, потврди Европската фудбалска унија (УЕФА).
Мартинез, во четвртокот, во реваншот од четвртфиналето против Лил доби жолт картон во 39. минута, а втор жолт картон при изведувањето на пенали поради неспортско однесување кон домашните навивачи.
Аргентинскиот голман не беше исклучен, бидејќи жолтите картони во текот на натпреварот не важат во пенал серијата.
Сепак светскиот првак со Аргентина доби суспензија. УЕФА го казни Мартинез бидејќи во пенал-серијата константно ја провоцираше домашната публика.
Астон Вила по изведувањето пенали го победи Лил со 4:3, а Мартинез одбрани два пенали, во првата и петтата серија им одбрани на Бенталеб и Андре.
Првиот натпревар од полуфиналето на Конференциската лига меѓу Астон Вила и Олимпијакос ќе се одигра на 2 мај во Бирмингем, а реваншот седум дена подоцна во Грција.
Спорт
Барселона сака да го врати Олмо
Дани Олмо, веројатно ќе го напушти Лајпциг во летниот преоден рок. Шпанскиот репрезентативец има откупна клаузула од 60.000.000 евра, сума која за богатите клубови не претставува никаков проблем.
Меѓу заинтересираните екипи се Манчестер јунајтед, Баерн и Барселона, од чија младинска школа потекнува Олмо.
Шпанецот оваа сезона одигра 22 натпревари за Лајпциг, постигна осум гола и забележа пет асистенции.
Како јуниор од Барселона премина во Динамо Загреб, како дел од трансферот на Ален Халиловиќ, а потоа за 29 милиони евра се пресели во Лајпциг.
Спорт
Ферстапен на пол-позицијата во Кина, Хамилтон ќе стартува од 18.место
Макс Ферстапен по победата во спринтот, доминираше и во квалификациите во пресрет на трката за Големата награда на Кина. Апсолутната доминација на Ред Бул ја потврди Серхио Перез кој трката ќе ја стартува од второто место.
Актуелниот светски првак со време 1:33.660 ја освои 37 пол-позиција во кариерата, а на Ред Бул му ја донесе јубилејната 100. победа во квалификациите.
Зад возачите на Ред Бул, од вториот ред трката ќе ја започнат Фернандо Алонсо (Астон Мартин и Ландо Норис (Мекларен).
Во Топ 10 место изборија Оскар Пјастри (Мекларен), двоецот од Ферари, Шарл Леклер и Карлос Саинц, односно Џорџ Расел (Мерцедес), Нико Хулкенберг (Хас) и Валтери Ботас (Заубер).
Во квалификациите потфрли Луис Хамилтон. Седумкратниот светски првак, откако спринт трката ја заврши на второто место, во квалификациите заврши на 18.место.
Траката за Големата награда на Кина, утре ќе започне во 9 часот по македонско време.