Атлетико Мадрид го доведе првиот играч во овој преоден рок. Станува збор за 33-годишниот белгиски играч за врска Аксел Витсел кој како слободен играч пристигна од Борусија Дортмунд. Сепак, „Марка“ тврди дека Атлетико не може да го регистрира својот нов фудбалер. Причината е од финансиска природа.

Имено, Атлетико е во „дебел минус“ кога е во прашање финансискиот фер-плеј, а трошоци се надминати за цели 100 милиони евра од дозволеното. Слична е ситуацијата и во Барселона, која не може да ги регистрира новите играчи, Франк Кеси и Андреас Кристенсен.

За да ја олесни ситуацијата, Атлетико е подготвен да го продаде Антоан Гризман, чија плата е преголем товар за клубот. Подготвени се да го ослободат Французинот за 40 милиони евра, а со тоа би се ослободиле од неговата плата која изнесува околу 30 милиони евра по сезона.

Францускиот првак Пари Сен Жермен сака да ја прекине соработката со Бразилецот Нејмар. Раководството на клубот е подготвено и комплетно да го исплати неговиот договор до 2027 година, а тој да го напушти Париз.

Шпанскиот медиум „Ел Паис“ наведува дека таткото на Нејмар и ПСЖ се договориле на фудбалерот да му биде исплатено се што е предвидено во договорот кој автоматски се продолжува до 2027 година. Нејмар треба да заработи 200 милиони евра од ПСЖ, без разлика дали ќе остане до крајот на договорот или не.

Со оваа уплата ПСЖ треба да го убеди Нејмар да си замине, а клубот го ангажирал новиот спортски директор Луис Кампос да ја спроведе целата операција.

Освојувачката на 23 гренд слем титули, Серена Вилијамс се врати на својот омилен терен, „Централниот терен“ на Вимблдон, за во драматичен меч кој траеше повеќе од три часа да загуби со 7:5/1:6/7:6(10:6) од Французинката Хармони Тан, за да најави дека крајот на кариерата можеби е на повидок.

40-годишната Американка паузираше од тенисот речиси 12 месеци, по повредата која ја доби во првото коло на минатогодишниот Вимблдон против Алиаксандра Саснович, пред минатата недела да се врати во игра во двојки на подготвителниот турнир во Истбурн.

Против Тан, таа имаше лош почеток, губејќи на свој сервис во првиот гем, но потоа во променлива игра, таа направи два брејка, кои беа залудни и Французинката го освои првиот сет. Но, борбеноста на Американката најдобро се покажа во вториот сет, кога во маратонскиот гем од 15 минути направи брејк за 2:0 предност и потоа рутински го освои со 6:1.

И во третиот сет, Тан не се откажа, меѓутоа Серена стигна до клучниот брејк за 5:4 водство, за да сервира за победа, пред Тан да направи рибрејк и потоа да пропушти две меч топки, пред Вилијамс да примора тај-брејк, во кој имаше 4:0 предност, пред да и дозволи на Французинката да ја оствари својата најголема победа во кариерата.

Во второто коло влезе и грчкиот ас, Стефанос Циципас, кој го победи упорниот Швајцарец, Александер Ричард со 7:6(1)/6:3/5:7/6:4.