Левиот бек на Реал Мадрид, Марсело по триумфот на „кралевите“ во финалето на Лигата на шампионите потврди дека си заминува од клубот, како фубалер со најмногу титули во дресот на „кралевите“, неверојатни 25 трофеи.

Тој почека да ја прослави титулата со своите соиграчи, по што потврди дека си заминува.

„Чувствувам голема радост и емоции. Тешко ми е да зборувам кога ги гледам семејството и моите соиграчи. Оваа сезона целосно ја заслужувавме. Ја освоив титулата од Лигата на шампионите пет пати, нешто што е тешко да се објасни. Ова е момент за младите момци кои го играа првото финале, а покажаа голема зрелост“, изјави Марсело.

Марсело покрај петте титули од ЛШ освои и четири трофеи од Светскиот клупски шампионат, три Европски суперкупови, шест трофеи од Ла лига, два од Копа дел реј и пет од Шпанскиот суперкуп.

Еден од моментите на вчерашното финале на Лигата на шампионите помеѓу Реал Мадрид и Ливерпул предизвика огромен интерес и многу контроверзи, откако голот на Карим Бензема во финишот на првото полувреме беше поништен поради офсајд.

Французинот ја смести топката во мрежата, откако според францускиот судија Клемен Турпан беше во офсајд позиција и покрај тоа што топката до него пристигна од Фабињо. Уште почудно, зад линијата на Бензема беше Енди Робертсон.

Судијата и ВАР проценија дека топката ја упатува Федерико Валверде, иако последниот допир доаѓа од Фабињо. Покрај тоа, Робертсон не се смета како играч кој би го поништил офсајдот, бидејќи Бензема е зад голманот, односно Робертсон во оваа ситуација се смета за голман – уште поточно, кога голманот не е на своја позиција, мора да има барем двајца дефанзивци зад стрелецот на голот.

Тибо Куртоа го имаше можеби мечот на својата кариера, помагајќи голот на Реал Мадрид да остане недопрен во финалето на Лигата на шампионите против Ливерпул, по што влезе во напа на англиските медиуми, кои според него не го почитуваат доволно.

30-годишниот Белгиец, кој освои две титули од Премиерлигата во седум години со Челси пред да направи трансфер во Реал Мадрид, во ЛШ оваа сезона имаше 59 одбрани со 80.56 отсто одбрани, но најдоброто го сочува за финалето, во кое имаше 9 одбрани.

„Кажав дека кога Мадрид игра финалиња, победува. Бев на вистинската страна на историјата. Ми беше потребна победа во финале за кариерата, за целата работа која ја имам посветено и мислам дека не добивам доволно почит, посебно во Англија. Видов многу критики, посебно во Англија. Ги победивме најдобрите клубови на светот“, изјави Куртоа.