Јувентус преку соопштение потврдија дека нивниот нов тренер Маурицио Сари има пневмонија откако неколку недели се мачеше со грипот и не е јасно кога ќе се врати на клупата на „бјанконерите“.

Тренерот неколку пати побара медицинска помош минатата недела, вклучувајќи пред традиционалниот пријателски меч со младинскиот тим во Вилар Пероса, по што не патуваше со тимот при 1:0 победата во пријателскиот меч со Триестина во саботата.

„Маурицио Сари по неколкудневен одмор, беше на работа со своите соработници, но не можеше да присуствува на тренингот поради грипот кој го мачи цела недела. Попладне тој беше на тестови кои покажаа дека има пневмонија и за која добива терапија“, се вели во соопштението на Јуве.

Останува нејасно дали тој ќе биде во доволно добро здравје да присуствува на првиот меч од новата сезона во Серија А против Парма. Поранешниот тренер на Наполи и Челси е познат по својата страст кон цигарите, кои уште повеќе ја влошиле неговата состојба.

Српскиот тренер Синиша Михајловиќ, кој се бори со леукемијата, во текот на мечот на неговиот тим Болоња против Пиза во Копа Италија им делел совети на фудбалерите од својата болничка соба.

Помошникот на Михајловиќ, Емилио де Лео потврди дека со „видео-технологија“ Симке се поврзал со своите играчи при победата од 3:0 на гости кај Пиза.

„Јас со слушалки сум поврзан со Балди, уште еден помошник на тренерот, а тој е во директна врска со Михајловиќ. За среќа добро го познаваме Синиша и понекогаш ги предвидуваме неговите идеи, но важно е тој да е вклучен и фудбалерите да бидат горди на него“, изјави Де Лео за „Газета дело спорт“.

Михајловиќ на 13 јули објави дека боледува од леукемија и го започна лекувањето во болницата во Болоња.

Ред бул рејсинг му понудиле на Фернандо Алонсо да се врати во Ф1 на местото на Пјер Гасли пред Британското ГП во Силверстоун, но добиле „корпа“ од двократниот Ф1 шампион.

Алонсо си замина од Ф1 на крајот на минатата сезона по четири разочарувачки сезони со Мекларен, но ова лето повторно беше поврзуван со враќање во спортот веќе следната сезона. И претходно беше објавено дека Ред бул веќе се договориле со него, пред на крајот да се решат да го заменат Гасли со Александер Албон од Торо росо.

Според шпанскиот весник „Мундо депортиво“, тимот од Милтон Кејнс му понудил место на Алонсо договор до крајот на сезоната, но Алонсо решил да остане надвор од спортот и да се фокусира на трките на издржливост и на можност следната сезона да вози во Инди кар со главна цел триумф на Инди 500.

Ова не е првпат Алонсо да се поврзува со „бикот“, откако Адријан Њуи, главниот инженер на тимот откри дека во 2007 година тие биле „многу блиску“ до Шпанецот но „за жал тоа не се случи“.