Спорт
Тајгер Вудс одбил над 700 милиони долари да се приклучи на саудиската ЛИВ голферска лига!

Голферската легенда Тајгер Вудс одбил понуда од 700 до 800 милиони долари да се приклучи на контроверзната нова голферска серија ЛИВ, спонзорирана од Саудиска Арабија, открива директорот на групацијта Грег Норман.
Норман, кој е двократен гренд слем шампион, вели дека ЛИВ Голф прво сакале да го постават Вудс за директор на серијата, но дека 15-кратниот гренд слем шампион ја одбил богатата понуда.
„Таа бројка беше таму пред јас да станам директор. Тајгер е човекот кој го поместува работите, така што секогаш ги сакате најдобрите. Прво му се јавија на Тајгер, и бројката беше од 700 до 800 милиони долари“, вели Норман во интервју за „Фокс“.
Иако Вудс остана верен на старата ПГА турнеја, повеќе голферски ѕвезди беа привлечени од парите кои ги нуди серијата која ја формираше Јавниот фонд на Саудиска Арабија (ПИФ), истата компанија која го купи англискиот премиерлигаш Њукасл јунјтед. Дастин Џонсон, Брајан Дешамбо, Фил Микелсон и Брукс Кепка веќе се дел од ЛИВ и имаат договори кои гарантираат заработувачка од 100 до 200 милиони долари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Маркез ја прекина соработката со Хонда

Шпанскиот возач во Мото ГП шампионатот, Марк Маркез и тимот на Репсол Хонда и официјално се договорија да ја прекинат соработката.
Една година пред истекот на договорот, двете страни се спогодија да се разделат на крајот од сезоната.
Маркез освои шест титули во „кралската класа“ во Хонда.
Оваа сезона шпанскиот возач освои само 22 бода и есе наоѓа на 19. место во генералниот пласман на возачи.
Маркез ја оствари својата прва победа во кралската класа на „Honda RC213V“ на Американското ГП во 2013 година во Тексас и стана најмладиот победник во премиер класата, а една година подоцна стана најмладиот светски шампион.
Спорт
Лосон разочаран од одлуката на Алфа Таури

Лиам Лосон, резервниот возач на Алфа Таури, призна дека е разочаран од одлуката на тимот, Даниел Рикардо и Јуки Цунода да возат за овој тим и следната година.
Младиот Новозеланѓанец на пет трки годинава го замени Рикардо во болидот, кој ја скрши раката, а трката во Катар ќе му биде последна сезонава во најбрзиот вагон.
„Секако дека сум разочаран, бидејќи мојата цел е постојано да бидам во Формула 1. Сепак, и покрај тоа, мотивиран сум да си обезбедам безбедно место меѓу најдобрите возачи на денешницата“, изјави Лосон.
Својот најдобар пласман Лосон го постигна во Сингапур, каде беше деветти и ги освои првите два бода. Со нетрпение ја очекува трката во Катар.
„Патеката е одлична. Има само еден бавен свиок, се друго се вози во најмалку четврта брзина. Се надевам на добра трка“, изјави Лосон.
Трката за Големата награда на Катар ќе се вози во недела на 8 октомври.
Спорт
Милевски го објави спискот за натпреварот со Украина – Повик не добија Несторовски, Велковски и Бабунски

Селекторот на македонската фудбалска репрезентација, Благоја Милевски го објави списокот со повикани фудбалери за квалификацискиот натпревар за ЕП 2024 против Украина во Прага и контролниот меч против Ерменија во Струмица.
Благоја Милевски за овие натпревари натпревари нема да смета на Илија Несторовски, Доријан Бабунски и Дарко Велковски кој сѐ уште нема клуб. Дефанзивецот Ѓоко Зајков не е на спиското поради повреда.
Во националниот тим, по долгото отсуство поради болест се враќа Дарко Чурлинов.
„Ова се фудбалерите кои беа и на претходниот собир. Сега со нас ќе биде и Дарко Чурлинов кој заигра за тимот до 23 години на Барнли. Ме радува фактот што е подготвен да се приклучи на репрезентацијата. Жал ми е што Зајков нема да е со нас. Разговарав со Доријан Бабунски, тој не е на списокот, што не значи дека нема да биде за следните собири.
Разговарав и со Илија Несторовски. Тој исто така не е повикан за овие натпревари од причина што сосема поинаква ни е тактичката замисла за двата натпревари. Несторовски има дадено многу за оваа репрезентација и покажуваме почит кон него со тоа што не праќаме покана колку само да биде овде, а без намера да го користиме“, рече селекторот и потоа направи мала анализа на она што ги очекува фудбалерите против Украина.
„Веќе влегуваме во завршницата и сите натпревари се клучни. Само победа ни одговара и нам, но и на Украина за да се најдеме во оптимална ситуација пред ноемвриските дуели. Очекувам отворен натпревар, бидејќи нема да се игра на реми. По ова ни следуваат дуелите со Италија и Англија, па ќе видиме. Анализиран е првиот натпревар со Украинците, особено тие завршни 30 минути. Воочени се аномалиите и позитивните работи. Ќе мора многу работи да поправиме од првиот меѓусебен меч“.
Украина ќе ја пречека Македонија на стадионот, на Спарта во Прага. Дуелот на 14 октомври ќе започне во 15 часот. Три дена подоцна Македонија во пријателски натпревар ќе игра против Ерменија.
Фото/ Игор Паневски Извор/ФФМ