Полицијата претпладнево извршила рација во официјалните простории на фудбалскиот клуб Барселона. Шпанските медиуми објавија дека се уапсени поранешни челници на клубот, меѓу кои е и експретседателот Џосеп Марија Бартомеу.

Според овие извори, рацијата е поврзана со аферата „Барсагејт“. Истрагата е поведена под сомнение дека Бартомеу профитирал од бизнис-зделките што ги правел клубот.

Наводно тој плаќал за на социјалните мрежи да ја рушат репутацијата на одредени поединци. Конкретно, Бартомеу на фирмата 13Ventures ѝ плаќал шестпати повеќе во однос на пазарната вредност.

Поради таа афера, полицијата веќе изврши една рација во јуни минатата година.

Покрај Бартомеу, денес биле уапсени Оскар Грау и Роман Гомес Понти.

Екипата на Петронас Јамаха го претстави моторот за новата сезона, во Мото ГП шампионатот. Сезонава за Петронас Јамаха ќе возат Валентино Роси и Франко Морбидели.

Претстојната сезона ќе биде трета за тимот од Малезија, во кралската класа во Мото ГП шампионатот. Во односот на претходните две години, измени има во боите, главната боја, тиркизната остана, а на остантиот дел од мотоциклот доминира црната боја.

Минатата сезона, Петронас имаше подобри резултати од фабричката Јамаха. Морбидели и Фабио Квартараро забележаа шест победи. Морбидели го освои второто место во генералниот пласман.

На Морбидели оваа сезона му се приклучи неговиот ментор, легендарниот Валентоно Роси. „Докторот“, прв пат по пауза од 20 години ќе вози за приватен тим.

Новата сезона во Мото ГП шампионатот ќе започне од Катар на 28.март.



Легендарниот хрватски фудбалер и тренер, Златко (Цицо) Крањчар, починал утрово на 65-годишна возраст, објави „Вечерњи лист“. Крањчар, починал по кратка и тешка болест во Клиничкиот болнички центар „Меркур“.

Крањчар како фудбалер во периодот од 1973 до 1991 година настапувал за Динамо Загреб, Рапид Виена и Сенкт Полтен. За овие три тима одиграл 582 натпревара, постигнал 257 гола. Во сезоната 1981/82 со Динамо стана шампион на Југославија.

За репрезентацијата на поранешна Југославија одиграл 11 натпревари, на кои постигнал три гола, а за Хрватска одиграл два натпревара и постигнал еден гол.

По завршувањето на фудбалската, ја почнал тренерската кариера, водел 20 клуба и репрезентации вклучувајќи ги Динамо, Ријека и НК Загреб, со овој тим во 2002 година стана шампион на Хрватска. Бил селектор на Црна Гора и и У23-селекцијата на Иран.