Килијан Мбапе ја донесе конечната одлука, а таа гласи – ќе потпише нов договор со ПСЖ. На овој начин сапуницата која траеше повеќе од шест месеци доби епилог. Повеќе извори потврдија дека Мбапе го извиси Реал Мадрид со одлуката да остане на „Паркот на принцовите“.

Џанлука Ди Марцио, еден од најсигурните извори, тврди дека Мбапе конечно решил да го одбие Реал Мадрид, но дека не се познати деталите од договорот со Пари Сен Жермен.

Се шпекулира дека Мбапе ќе добие огромна плата (околу 60 милиони евра) и бонус од преку 100 милиони евра за потпишување на новиот договор, а Мбапе ќе добие 100 проценти од парите од маркетинг правата. Исто така, ПСЖ решија да направат преседан, со одлуката да му дозволат на фудбалерот да одлучува околу изборот на новиот тренер и засилувањата.

Ова е голем удар за Реал Мадрид, најмногу поради тоа што Флорентино Перез целата своја енергија и пари и планови ги вложи во Мбапе и се откажа Ерлинг Халанд кој се сели во Манчестер Сити.

Првиот човек на Ла Лига, Хавиер Тебас, тврди дека Барселона нема шанси да го донесе Роберт Левандовски во летниот преоден рок. Тебас се повикува на финансиските прописи кои лани беа клучни за заминувањето на Лионел Меси. Првиот човек на Ла Лига откри дека трансферот и платата на Левандовски не може да се вклопи во финансиите на клубот.

Во разговор со „Марка“ на тема Барса и Левандовски, Тебас рече.

„Бројките се едноставна работа. Кога имаш загуба од над 500.000.000 евра во последните две години, прво треба да ја покриеш, а потоа да донесеш играчи. Левандовски има договор со Баерн на уште една година, па кога ќе се земе во предвид неговата плата и сумата што ја бараат Германците за обесштетување, не гледам како Барселона би можела да го доведе“.

Во теорија, спас може да биде продажбата на играчи. На пример, Френки де Јонг, кој може да заврши во Манчестер Јунајтед.

„Тоа би можело да биде решение, но зависи од тоа за клоку пари ќе го продаде Барселона овој играч. На пример, од целата пресметка, која вклучува продажба на играчи, па исплатена отштета и плата за другиот, Барселона би трабала да биде во плус од 100.000.000 евра. Де Јонг може да го донесе тоа. Ако воопшто планираат да го продадат“, изјави Тебас.

Според информациите на медиумите, Левандовски договорил тригодишен договор и годишна плата од 9.000.000 евра. Баерн веројатно би прифатиле обесштетување од 40.000.000 евра.

Евертон успеа да опстане во Премиерлигата, а борбата за избегнување на последното место кое води во Чемпионшип ќе ја водат Барнли и Лидс. Сепак, овие два клуба решија да водат правна пресметка против тимот од Гудисон, сомневајќи се дека потрошиле повеќе од дозволеното.

Барнли и Лидс побараа од Премиерлигата да ги истражи финансиите на директниот конкурент за опстанок. Посочуваат дека пријавените загуби на Евертон за последните три сезони изнесуваат дури 372 милиони фунти, а според правилата на Премиер лигата за тој период се дозволени 105 милиони фунти.

Евертон пријави загуба од 170 милиони фунти во последните две сезони, но со оправдување дека тоа се случи поради пандемијата на коронавирусот. Посочуваат и дека имале трошоци за новиот стадион и клупската академија, но и за женскиот тим.

Екипата од Гудисон претрпе и голем финансиски удар кога мораше да ги раскине спонзорските договори со компаниите, каде ко-сопственик е Алишер Усманов, бидејќи рускиот милијардер падна под санкциите на Велика Британија поради вооружениот конфликт во Украина.

Овој случај треба да се следи бидејќи можно е да му се одземат бодови на Евертон доколку се докаже дека обвинувањата се вистинити, а тоа би можело значително да влијае на редоследот на табелата.