Македонскиот претставник Академија Пандев вечерва го игра првиот натпревар од пресметката против Лехија Гдањск од квалификациите во Конференциската лига на УЕФА. Противникот е голем фаворит, а тренерот Ѓорѓе Стојчев верува дека овие европски дуели ќе бидат големо искуство за неговиот млад тим.

Нашиот тим се надева дека може да направи изненадување.

„Ние сме мал клуб и вторпат излегуваме во Европа, но подготвени сме за предизвикот. Лехија Гдањск е фаворит, но ние ќе сториме се за да одиграме квалитетно и да избориме поволен резултат за нас. Верувам дека ова ќе биде непроценливо искуство за овој млад тим на Академија Пандев“, изјави Ѓорѓе Стојчев пред вечерашниот меч во Гдањск.

Натпреварот меѓу Лехија Гдањск и Академија Пандев се игра вечерва, со почеток во 20.15 часот, на „Полсат плус арена“ во Гдањск.

Елена Рибакина од Казахстан е втората финалистка на Вимблдон. Таа во финалето ќе и се спротистави на Онс Жабер, која прва обезбеди пласман во мечот за трофејот.

Рибакина во два сета беше поуспешна од некогашната најдобра светска тенисерка, Романката Симона Халеп. Таа славеше со 6-3, 6-3.

Елена Рибакина ги доби првите три гема и најави дека е подготвена да го добие првиот сет. Во ист ритам продолжи и во вториот, и го доби со идентични 6-3.

Македонскиот фудбалски клуб Шкендија вечерва на Националната арена „Тодор Проески“ во Скопје го пречекува ерменскиот тим Арарат во првиот меч од воведното коло во квалификациите на Конференциската лига на УЕФА. Нашиот претставник важи за умерен фаворит, а тренерот Артим Шаќири вели дека првиот меч е многу важен за крајниот исход.

„Подготвени сме за предизвикот. Го анализиравме Арарат до детали и нема да го потцениме. Сепак, исто така и не треба да го прецениме ривалот. Веруваме во нашите квалитети и треба да докажеме дека сме подобар тим“, истакна Артим Шаќири.

Капитенот Егзон Бејтулаи се надева дека Шкендија ќе има солидна европска одисеја оваа година.

„Имавме две неуспешни години во Европа и се надевам дека сега ќе бидеме многу подобри. Посакувам повторно да дојде некој голем европски тим во Македонија, а за тоа ќе треба да оствариме неколку победи“, изјави Бејтулаи.

Натпреварот меѓу Шкендија и Арарат започнува од 20 часот на Националната арена во Скопје.