Федерика Брињоне по разочарувачкиот настап на Светското првенство, се врати на победите во Светскиот куп со триумф на домашен снег на супер-џи трката во Вал ди Фаса, така остварувајќи ја својата 16. победа од СК, со што се израмни со легендарната италијанска скијачка Дебора Компањони.

Брињоне беше за 0.59 секунди побрза од фантастичната Швајцарка Лара Гут-Бехрами, додека третото место отиде кај уште една Швајцарка, Корин Сутер со 0.72 секунди послабо време. Во топ 5 беа уште две Италијанки – Елена Куртони и Франческа Марсаља

„Прекрасно достигнување е да се стигне Компањони, но не планирам да застанам тука. Имам уште иднина во овој спорт и многу соништа“, вели Брињоне.

Трката исто така ја одбележи и страотниот пад на 22-годишната Норвежанка Кајса Викхоф, која при огромна брзина се удри во заштитната ограда и веднаш со хеликоптер беше однесена во болница. Се верува дека има скршеница на нозете.



Хрватскиот фудбалер Ален Халиловиќ постигна убав гол за на своите Бирмингем сити да им донесе 2:1 победа над Квинс Парк Ренџерс во 33. коло на англиската втора лига, но најмногу внимание на Балканот предизвика неговата маичка со ликот на Ѓорѓе Балашевиќ, неодамна починатиот кантавтор од Србија.

Поранешниот фудбалер на Динамо Загреб, влезе во игра во 63. минута, и го постигна својот прв гол за Бирмингем по трансферот минатата година.

Brilliant first goal by 🇭🇷 Alen Halilović (24) for Birmingham City in a 2-1 win against QPR. pic.twitter.com/V2F957Xs0D

— Croatian Scout (Suspended again) (@CroatianScout2) February 27, 2021

Австралискиот тенисер Алексеј Попирин ја комплетираше неделата од соништата, враќајќи се од сет негатива за 4:6/6:0/6:2 победа над Александер Бублик за да ја освои својата прва АТП титула на Сингапур опен.

21-годишниот Попирин беше доминантен на сервис за да го победи четвртиот носител за 84 минути, губејќи само шест поени на свој сервис, и освојувајќи седум гема во низа без загубен поен на свој сервис од 3:5 во првиот сет. Пред оваа недела, најголем успех на Попирин беше четврт-финале на АТП турнир.

„Многу работа, многу пожртвуваност за да се стигне до овој момент за мене, моето семејство и мојот тим. Горд сум што конечно успеав“, изјави Попирин.

Казахстанецот Бублик исто така одеше на прва АТП титула во своето второ финале во 2021, откако мораше да се повлече од финалето во Анталија, а покрај тоа загуби и во финалињата во Њупорт и Ченгду во 2019 година.