Спорт
(Видео) Хаверц во 92-та минута му пресуди на Спортинг
Фудбалерите на Арсенал го победија Спортинг во Лисабон со 1:0 во првиот натпревар од 1/4 финалето на Лигата на шампионите.
Стрелец на единствениот гол беше резервистот Каи Хаверц во втората минута од судиското продолжение на асистенција на Габриел Мартинели.
Да не беше голот на германскиот фудбалер, ова ќе беше еден од оние натпревари што бргу се забораваат.
Имаше, моменти што вреди да се споменат.
Гредата се тресеше двапати, по еднаш на двете страни. Првиот пат беше во 7-та минута, кога Максимилијано Араухо опасно се закани, а во 16-та, Нони Мадуеке речиси постигна гол директно од корнер.
Второто полувреме беше идентилно на првото, со многу тактичко надмудрување, претпазливо, борбено, без многу шанси, без вистинска конкретна креација од двете страни.
Арсенал играше многу дисциплинирано во одбраната на својот гол и исклучително трпеливо со напаѓачките акции.
Во 65-та минута, Арсенал постигна гол, кој оправдано беше поништен поради офсајд.
Спортинг имаше две солидни шанси, обете на десет минути пред крајот, преку Катамо и Суарез, но и во двете ситуации голманот на Раја одбрани.
Реваншот во Лондон се игра за осум дена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Френк Лампард по 25 години го врати Ковентри во Премиер лигата
Ковентри се врати во Премиер лигата по 25 години чекање. Освоениот бод во драматичната завршница на гостувањето кај Блекбурн Роверс, во натпревар што заврши со резултат 1:1, беше доволен за тимот на Френк Лампард математички да обезбеди промоција воелитниот ранг на англискиот фудбал.
„Херој на историската вечер беше Боби Томас, чиј гол со глава во 84-та минута донесе неопислива прослава за навивачите на „Небесно сините“, пишува Би-Би-Си.
Се чинеше дека прославата ќе биде одложена, откако Блекбурн поведе во 54-та минута. Риоја Моришита му донесе предност на Белкбурн.
За домашниот тим, освоениот бод е исклучително важен во борбата за опстанок во лигата.
Поминаа точно 9099 дена од последниот натпревар на Ковентри Сити во Премиер лигата. Враќањето во елитата предизвика силни емоции. По последниот свиреж на судијата, навивачите на трибините беа во солзи, играчите славеа на теренот, а менаџерот Френк Лампард, познат по својата воздржаност, мирно се ракуваше со своите колеги.
Спорт
(Видео) Интер сигурно чекори кон шампионската титула
Фудбалерите на Интер го победија Каљари на домашен терен со 3:0, во 33-то коло од Серија А.
Од самиот почеток, Интер наметна висок ритам на играта, со константен посед на топката и постојан притисок врз последната линија на Каљари. Гостите од Сардинија издржаа во првото полувреме кое заврши без голови.
На првиот гол се чекаше до 52-та минута, кога Маркус Тирам со глава ја испрати топката во мрежата по центаршут од левата страна.
Само четири минути подоцна, Николо Барела, ја дуплираше предноста на својот тим, а конечниот резултат го постави Зиелински во втората минута од судиското продолжение.
По оваа победа, Интер со натпревар повеќе има 12 поени повеќе од Наполи.
Foto/ EPA
Спорт
Почина легендарниот Оскар Шмит
Тажна вест, доцна во петокот, пристигна од Бразил. Оскар Шмит, еден од најголемите стрелци во историјата на кошарката, почина на 69-годишна возраст.
Членот на Салата на славните, познат по прекарот „Света Рака“, страдаше од тумор на мозокот 15 години.
Членовите на неговото семејство потврдија дека Шмит си заминал со „храброст, достоинство и неуморен дух, останувајќи пример за решителност, дарежливост и љубов кон животот“.
Статистичарите евидентираа дека Шмит постигнал вкупно 49.973 поени за време на неговата професионална кариера во сите натпреварувања, што го прави најдобар стрелец во историјата на кошарката до април 2024 година, кога го престигна Леброн Џејмс.
Шмит никогаш не играл во НБА, но бил високо ценет во Бразил поради неговата посветеност на националниот тим и неговите настапи на рекордни пет последователни Олимписки игри.
Тој е рекордер на олимпискиот турнир по бројот на поени. Беше клучен играч на бразилскиот тим во антологиската победа над селекцијата на САД на Панамериканските игри во 1987 година.
Својата професионална кариера ја започна во 1974 година и поголемиот дел од неа го помина во Бразил и Италија, каде што стана идол од детството на идниот великан Коби Брајант. Во 1984 година, тој беше избран од Њу Џерси Нетс во шестата рунда од драфтот на НБА. Тренираше со тимот, но го одби договорот. Во тоа време, на играчите од НБА не им беше дозволено да играат за националните тимови.
Со висина од 205 см, тој беше исклучително прецизен шутер за тројки во 1980-тите, кога тројката не беше ни приближно толку честа како што е денес. Токму затоа го доби прекарот „Мао Санта“ („Света рака“).
