Фудбалската репрезентација на Турција се најде во центарот на вниманието на Светското првенство откако тројца репрезентативци биле снимени на балкон додека пушеле.

Снимката брзо се проширила на социјалните мрежи и предизвикала бројни реакции кај навивачите. Дополнителни контроверзии предизвикале шпекулациите на дел од корисниците дека не станува збор за обични цигари, туку за џоинт, иако за таквите тврдења засега нема официјална потврда.

„Веќе не заслужуваш да бидеш во репрезентацијата, а сега уште и пушиш“, гласи еден од коментарите на незадоволните навивачи.

Засега Фудбалскиот сојуз на Турција не се огласил по повод снимката, ниту е познато дали ќе биде покрената дисциплинска постапка против фудбалерите.

Турција на Мундијалот настапува во групата Д заедно со САД, Парагвај и Австралија, а останува да се види дали инцидентот ќе влијае врз атмосферата во тимот пред следните натпревари.

According to this video and reports, Çağlar Söyüncü and 2 other national team players, who aren’t clearly recognizable, were caught smoking.

Some say it was a joint, others say cigarettes.

Unbelievable.

You already don’t deserve to be at the National Team and now you smoke.🤨 pic.twitter.com/LxF8dcjUEz

— Turk Scout (@ScouTurk) June 13, 2026

Репрезентативецот на Босна и Херцеговина, Јово Лукиќ, изјави дека би го заменил својот прв гол за националниот тим доколку тоа значело победа против Канада на Светското првенство.

„Не можев да замислам поубаво сценарио од тоа првиот гол за репрезентацијата да го постигнам токму на Светско првенство. Сепак, жал ми е што не победивме. Повеќе ќе ми значеше да освоевме три бода, а јас да не постигнев гол“, рече Лукиќ по ремито 1:1.

Тој додаде дека освоениот бод може да биде важен за пласман во следната фаза, но само ако тимот продолжи да се бори во секој натпревар како против Канада.

Лукиќ им се заблагодари и на навивачите, истакнувајќи дека атмосферата била како да играат во Босна и Херцеговина.

Селекторот Сергеј Барбарез оцени дека ремито е реален исход и дека освоениот бод е важен во борбата за пласман понатаму.

„Секогаш останува жал кога водите, но мислам дека 1:1 е заслужен резултат. Ова е добар бод за нас, но нема да пресметуваме по првиот натпревар. Ќе се обидеме да победиме во следните два“, изјави Барбарез.

Напаѓачот на американската репрезентација Фоларин Балоган изјави дека чувството да постигне два гола на Светско првенство е нешто што ги надминало неговите очекувања.

„Замислував како ќе биде кога ќе постигнам гол на Светско првенство, но реалноста го надмина тоа. Ова е ноќ од соништата“, рече Балоган по победата на САД од 4:1 против Парагвај.

Балоган, кој во минатото можеше да избира дали ќе настапува за САД или Англија, истакна дека навивачите му дале голема поддршка откако во 2023 година решил да игра за американската репрезентација.

„Сакав да им возвратам за поддршката и мислам дека денес имав одлична можност за тоа. Сакам да продолжам да покажувам дека ја донесов вистинската одлука“, изјави 24-годишниот напаѓач.

Неговиот соиграч Кристијан Пулишиќ го пофали настапот на Балоган, велејќи дека е исклучително опасен пред противничкиот гол и дека многу придонесува за играта на тимот.