Чешката тенисерка Маркета Вондрушова, шампионка на Вимблдон во 2023 година, се соочува со суспензија до четири години откако беше обвинета за кршење на антидопинг правилото поради одбивање на тест.

Спорниот инцидент се случил во декември за време на ненајавено тестирање надвор од тениските терени. Вондрушова тврди дека по 20 часот непознато лице заѕвонило на нејзината врата, одбило да се идентификува и побарало итен примерок од урина. Во тој момент, таа одбила да го пушти внатре, оценувајќи ја ситуацијата како сериозно нарушување на приватноста.

Против неа потоа беше покрената постапка од Меѓународната агенција за интегритет на тенисот за „одбивање или недавање примерок без основана причина откако била известена од овластено лице“.

Шампионката на Вимблдон во 2023 година ја даде својата верзија на настаните на социјалните мрежи, нагласувајќи дека дејствувала од страв, а не за да избегне тестирање.

„Кога некој ќе ви заѕвони на врата доцна навечер без јасно да ве идентификува и да ја следи постапката, реагирате како личност која била исплашена. Во тој момент, стануваше збор за чувство на безбедност, а не за избегнување на нешто“, рече Вондрушова.

Таа додаде дека низ годините добивала навреди и закани, но и проблемите со повредите и спиењето, влијаеле врз нејзината ментална состојба и чувството на безбедност. Вондрушова, особено нагласи дека ситуацијата ја потсетувала на нападот врз нејзината сонародничка Петра Квитова од 2016 година, кога напаѓачот влегол во станот под лажни изговори и сериозно ја повредил.

„Стравот ми го замагли расудувањето. Не можев рационално да ја разберам ситуацијата“, рече таа, додавајќи дека експертите ѝ дијагностицирале акутна стресна реакција и генерализирано анксиозно растројство.

Агенцијата потврди дека истрагата е во тек, но дека сè уште нема автоматска суспензија.

Според правилата на Светската антидопинг агенција, тенисерките мора редовно да ја пријавуваат својата локација и да закажат термин од еден час дневно за потенцијално тестирање, но контролите можат да се спроведуваат и надвор од тој период.

Вондрушова не играла натпревари во поединечна конкуренција од јануари поради повреда на рамото, но неодамна играше во двојки за Чешка. Нејзиниот следен закажан турнир е Мастерсот во Мадрид, кој започнува на 20 април.

Foto/ Depositphotos

Англискиот Борнмут ќе има нов тренер од следната сезона. „Црешите“ ќе ги предводи Марко Розе.

Според англиските медиуми, германскиот стратег постигнал договор со клубот од јужниот дел на Англија, и ќе го замени шпанскиот тренер Андони Ираола, кој неодамна го објави своето заминување на крајот од сезоната.

Розе е без клуб од минатиот март кога беше отпуштен од Лајпциг.

Поранешниот тренер на Салцбург и на Борусија Дортмунд, како и на Лајпциг, официјално ќе го преземе тимот на лето, но дотогаш, заедно со новиот клуб, ќе планира и ќе прави стратегија за претстојните предизвици, прво во однос на трансферите.

Foto/ Depositphotos

Орландо Меџик и Феникс Санс ќе играат во плејофот на НБА шампионатот по не толку интересните натпревари од плејофот, одиграни во ноќта помеѓу петок и сабота. Орландо го декласираше Шарлот со 121:90 и сега има следи серија против фаворизираниот Детроит, додека Феникс го победи Голден Стејт со 111:96, па во четвртфиналето од плејофот ќе се сретнат со Оклахома Сити Тандер.

Паоло Банкеро постигна 25 поени, а Орландо водеше со 35 поени, па може да се каже дека Орландо лесно ги победија Шарлот Хорнетс во решавачкиот натпревар од плеј-ин турнирот.

Меџик така го обезбедија осмото место во Источната конференција и ќе се соочат со првопласираниот Детроит во серија од четири победи што започнува во недела, во Детроит.

Орландо водеше со 31 поен на полувремето, тоа е најголема предност на полувреме од седумгодишната историја на плејинот.

Ламело Бол, за кого НБА рече дека требало да биде суспендиран во победата над Мајами во вторникот, поради недосуден фаул врз Бама Адебајо, ги предводеше Хорнетс со 23 поени, од кои 21 во третата четвртина.

Меџик беа елиминирани во првото коло од плејофот во последните две сезони и не победија во плејофот од 2010 година. Но, оваа сезона тие имаа резултат 2:2 против моќните Пистонс.

Хорнетс, кои ги победија Меџик во последните три натпревари од регуларната сезона, немаат пласман во плејофот од 2016 година. Тоа е најдолгата активна суша во НБА.

Џејлен Грин постигна 36 поени, Девин Букер 20, а Феникс Санс ги победија Стеф Кари и Голден Стејт Вориорс со 111:96.

Санс, го освоија осмото место во плејофот на Западната конференција и ќе се соочат со актуелниот шампион на НБА, Оклахома Сити Тандер, во првиот натпревар во недела. Сезоната е завршена за Вориорс.

Грин шутираше 14 од 20 од поле, вклучувајќи 8 од 14 тројки. Џордан Гудвин постигна 19 поени, имаше девет скока и беше вистинска закана во одбраната со шест украдени топки. Букер и Дрејмонд Грин од Голден Стејт добија по две технички грешки кон крајот на четвртата четвртина по жестока расправија и беа исклучени.

38-годишниот Кари не можеше да погоди лесни шутеви и заврши со 17 поени со 4 од 16 шут од игра. Брендин Подзиемски ги предводеше Вориорс со 23 поени.