Фудбалскиот клуб Галатасарај е сериозно заинтересиран за фудбалерот на Интер, Хакан Чалханоглу. Капитенот на турската репрезентација има договор со Интер до јуни 2027 година.

Турските медиуми, во денешните изданија пишуваат дека се очекува доаѓањето на агентот на турскиот фудбалер Гордон Стипиќ во Истанбул за да се започнат преговорите. Засега не е познато колкаво обесштетување ќе побара Интер за Чалханоглу.

Специјализираната веб-страница „Трансфермаркт“ проценува дека вредноста на Чалханоглу на пазарот е 35 милиони евра, па се очекува дека Интер ќе бара толку.

Патем, Интер имаше лоша сезона, во самиот финиш ја загуби титулата во Серија А, која ја освои Наполи, додека во финалето на Лигата на шампионите загуби од Пари Сен Жермен.

Манчестер јунајтед е заинтересиран за голманот на Астон Вила, Емилијано Мартинез, тврдат британските медиуми.

Менаџерот на „црвените ѓаволи“, Рубен Аморим, не е задоволен од формата на Андре Онана, и затоа решил да ангажира нов голман.

Мартинез има договор со Астон Вила до 30 јуни 2029 година. Сепак, некои британски медиуми објавија дека започнале преговори меѓу претставниците на Манчестер јунајтед и Астон Вила во врска со трансферот на аргентинскиот голман во тимот од „Олд Трафорд“.

Мартинез пристигна во Астон Вила во 2020 година од Арсенал. Тој беше член на лондонскиот клуб од 2012 година, а пред да се приклучи на клубот од Бирмингем, играше на позајмица во Оксфорд, Шефилд Венздеј, Ротерам, Вулверхемптон, Хетафе и Рединг.

Реконструкцијата на „Максимир“ продолжува, се поизвесно е дека Динамо ќе го напушти долгогодишниот капитен.

По Бруно Петковиќ, Марко Пјаца, Стефан Ристовски, Динамо ќе се раздели и со клупската икона, Аријан Адеми, пишува „Germanijak“.

Поранешниот македонски репрезентативец, Адеми разговарал со директорот Звонимир Бобан и дознал дека доколку остане во клубот ќе има лимитирана минутажа, што не се совпаѓа со амбициите на искусниот 34-годишен играч од средниот ред кој сака да продолжи да игра.

Мали се шансите тој да остане во Динамо, каде пристигна во 2010 година. Една сезона помина на позајмица во Локомотив, а пред две години имаше шестмесечна авантура во Кина.

Адеми одигра над 400 натпревари за Динамо во сите натпреварувања.