Спорт
За нив црвен картон е секојдневие – кои се „највалканите“ фудбалери?
Играчот на Атлетико Мадрид, Луис Суарез (33) го зазема првото место на оваа неславна листа откако на СП во 2014 година во Бразил го гризна Италијанецот Џорџо Киелини. Уругваецот е познат и по бројните симулации.
Втор на листата е Шпанецот Серхио Рамос (34), дефанзивецот на Реал Мадрид. Во Ла Лига има 20 црвени картони досега, во Лигата на шампиони – 6.
„Питбул“ е прекарот на Фелипе Мело (37), прекар добиен по исклучително агресивната игра. Бразилскиот фудбалер во кариерата заработил 14 црвени картони, а играше за врвни екипи – Интер, Јувентус, Галатасарај.
Португалецот Пепе (37) е најпознат по својата кариера во Реал Мадрид. Познат е и по агресивниот стил на игра, ќе остане запаметен кога во 2012, против Барселона намерно го нагази Лео Меси.
Шведскиот фудбалски ветеран Златан Ибрахимовиќ (39) секако се најде во ова друштво. И на терен и надвор од него, „пука“ од ароганција. Познат е по тоа што има „краток фитил“, а во кариерата се тепал и со соиграчи, на тренинг. Досега заработил 13 црвени картони.
Англичанецот Вејн Руни (35) кој во 2017 година стана најдобриот стрелец меѓу „црвените ѓаволи“ има темперамент кој често не може да го контролира. Често во кариерата заработува исклучувања поради навери и удирање на противнички играчи.
Италијанецот Марио Балотели (30) беше еден од најталентираните светски фудбалери, но често во јавноста неговото име се споменува поради недисциплина и постапки кои не доликуваат на фудбалска ѕвезда. Заработил 12 црвени картони за 6 различни екипи.
Поранешниот италијански фудбалер, актуелен тренер на Наполи, Џенаро Гатузо во фудбалскиот свет ќе остане запаметен како агресивен играч кој молневито реагира – вистински војник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Гвардиола за Жоао Кансело: Ќе видиме на крајот на сезоната
Жоао Кансело е член на Манчестер Сити, а моментално е на позајмица во Барселона до крајот на сезоната. Прашање е дали Барселона сака да го отткупи неговиот договор, откако Португалецот беше означен како еден од главните виновници за елиминацијата од ПСЖ од Лигата на шампионите и поразот од Реал во Ел Класико.
Менаџерот на Манчестер Сити, Пеп Гвардиола изјави дека на крајот на сезоната ќе одлучи дали Кансело ќе се врати во клубот, пренесуваат британските медиуми.
„Се уште не сме разговарале за иднината на Кансело во нашиот клуб. Ќе разговараме на крајот на сезоната“, изјави Гвардиола.
Кансело (29) е член на Манчестер Сити од 2019 година. Тој има договор со англискиот клуб до 30 јуни 2027 година.
Вториот дел од минатата сезона Кансело го мина на позајмица во Баерн, а потоа Манчестер Сити го испрати португалскиот фудбалер на едногодишна позајмица во Барселона.
Кансело оваа сезона одигра 36 натпревари за Барселона и постигна четири гола.
Спорт
„Заминувам ако Алегри остане тренер“
Федерико Киеза (26) е подготвен да го напушти Јувентус. „Газета дело Спорт“, дури тврди дека италијанскиот репрезентативец им поставил ултиматум на клупските челници.
Енрико Киеза, сезонава не игра на вообичаеното ниво откако се опорави од тешката повреда.
Иако италијанскиот репрезентативец постигна скромни осум гола и две асистенции за неговите стандарди, Јувентус би сакал да го задржи, но се уште нема никаков напредок во преговорите.
Неговиот актуелен договор е до 2025 година, што значително го намалува просторот за маневрирање на клубот.
Киеза на лето би можел да влезе во последната година од договорот и тоа ќе биде последна шанса да клубот заработи од неговиот трансфер.
„Газета дело Спорт“, пишува дека Киеза својот потенцијален останок во клубот го условува со ултиматум. Италијанскиот весник пишува дека Киеза на затворен состанок јасно им кажал на клупските челници дека сигурно ќе го напушти клубот доколку Масимилијано Алегри остане тренер и во следната сезона.
Сериозен интерес за Киеза покажа Рома, односно нејзниот тренер Даниеле Де Роси, кој ќе ја доби довербата да го предводи тимот и наредната сезона.
Спорт
Барселона подготвува мегатрансфер, го продава Араухо за 100 милиони евра
Барселона е подготвена да го продаде Роналд Араухо (25), објави каталонски „Спорт“. Овој извор наведува дека Барселона мора да заработи од трансфери на играчи во летниот преоден рок за да избегне финансиски проблеми и да ги исполни критериумите од финансискиот фер-плеј.
Уругвајскиот дефанзивец е еден од фудбалерите кои имаат најголема пазарна вредност. Раководството на Барселона смета дека од неговиот трансфер би можеле да заработат повеќе од 100 милиони евра.
„Трансфермаркт“, неговата вредност ја проценува на 70 милиони евра, а неговиот договор со Барселона истекува во јуни 2026 година.
Барселона смета, тврди „Спорт“, дека во суперталентот Пау Кубарси (17), има квалитетна дефанзивна опција. Доколку би го продале Араухо, Барселона би се обидела да донесе слободен играч кој би му бил партнер на Кубарси.
Араухо ја започна својата кариера во уругвајските клубови Рентистас и Бостон Ривер. Во 2018 година Барселона го донесе за речиси пет милиони евра, а оттогаш забележа 147 настапи, постигна осум гола. Со Барселона има освоено три трофеи.