Спорт
Зидан објасни зошто не прифатил да стане менаџер на Манчестер јунајтед
Легендарниот француски поранешен фудбалер и тренер, Зинедин Зидан, вели дека е подготвен да се врати на работа, со репрезентативна кариера како најпожелна, иако додава дека нема многу опции.
Во интервју за „Л’Екип“, Зидан открива дека не бил во позиција да размисли да го преземе Манчестер јунајтед кога се отворила шанса, и зборува за двете позиции со кои најмногу го поврзуваат – Пари Сен-Жермен и француската репрезентација. Тој е без работа по заминувањето од Реал Мадрид во текот на летото 2021 година.
„Никогаш не вели никогаш, посебно во денешно време. Кога бев фудбалер, можев да го изберам речиси било кој тим. Како тренер, нема 50 клубови каде што можам да одам, туку само можеби две-три можности. Ако се вратам во клуб, тогаш тоа ќе биде да победувам. Тоа го кажувам и покрај мојата скромност. Затоа не можам да одам насекаде. Има други причини поради кои исто така ме спречуваат. На пример јазикот. Кога луѓето ми велат: ‘Дали сакаш да одиш во Манчестер?’ Сфаќам англиски, но не го говорам навистина добро. Знам дека има тренери кои одат во клубови без да го зборуваат јазикот, но јас работам поинаку. За да победуваш, потребни ти се толку многу елементи. Јас знам што ми е потребно да победувам“, објаснува Зидан.
Иако клупскиот фудбал му нуди повеќе опции, Зидан, кој има 108 настапи за Франција, не крие дека би сакал да стане селектор на „триколорите“.
„Не сум завршен со Франција. Секако, го сакам тоа. Се надевам еден ден тоа ќе се случи. Кога? Тоа не е до мене да одлучам. Сакам да имам заокружен настап со Франција. Тоа е врвот. Дали ќе го наследам Дидие Дешам? Не знам. Ако треба да се направи тоа, ќе дојде време. Желбата е тука. Француската репрезентација е најпрекрасното нешто што е можно за мене“, додава Зидан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Димитров го растури Алкараз во Мајами
Григор Димитров го победи Карлос Алкараз со 6:2, 6:4 во четвртфиналето на Мастерсот во Мајами. Ова беше петти меѓусебен дуел на Бугаринот и Шпанецот и втора победа по ред за Димитров.
„Направи да се чувствувам како да имам 13 години“ – го опиша Карлос Алкараз поразот од Бугаринот
„Не се сеќавам некој да ме натерал да се чувствувам вака. Вакво нешто одамна не ми се случило. Не знаев што да правам. Барав решенија, но тој не ми даде. Почувствував неверојатна фрустрација.“
А 32-годишниот Димитров навистина одигра перфектно. Мечот го заврши со 24 винери.
„Генијалноста е често во едноставноста. Знаев дека морам да бидам поагресивен, да ги водам поените. Против него е многу тешко да се направи тоа“ – објасни Бугаринот како го победи шампионот на Индијан Велс.
Можеше и побрзо да победи бидејќи водеше со 4:1 во вториот сет, но потоа Алкараз успеа да врати еден брејк, но не успеа да се врати во мечот.
Спорт
Тонали сега е на удар и на Англичаните поради обложувањето
Играчот од средниот ред на Њукасл, Сандро Тонали е под истрага од Фудбалската асоцијација (ФА) поради прекршување на правилата против обложување.
Италијанецот веќе отслужува 10-месечна суспензија од Италијанскиот фудбалски сојуз поради обложување за време на неговото играње за Милан.
Новите докази покажуваат дека Тонали се обложувал и кога дошол во Њукасл. Младиот 23-годишен играч го прекршил правилото дури 50 пати од 12 август до 12 октомври 2023 година.
На Тонали му е даден рок до 5 април да одговори на обвиненијата.
„Добивме потврда дека е покрената истрага. Клубот и Тонали целосно ќе соработуваат. Тоа е се што можеме да кажеме во моментов“, се вели во соопштението за медиумите на клубот.
Тонали пристигна во Њукасл минатиот јули во трансфер вреден 60 милиони фунти од Милан.
Спорт
Најдобриот судија во БиХ поради закани одби да им суди на Железничар и Сараево
Шампионатот на Босна и Херцеговина влегува во завршна фаза, а локалниот портал „Спортспорт“, пишува дека најдобриот судија, Ирфан Пељто одбил да им суди на клубовите кои доаѓаат од главниот град Железничар и Сараево) до крајот на сезоната.
Пељто тоа го направил поради наводните закани што ги добивал тој и неговото потесно семејство, кои ги пријавил во полиција. Најдобриот судија од БиХ за својата одлука го известил Судискиот комитет на Фудбалскиот сојуз на Босна и Херцеговина, кој ја прифатил неговата одлука.
Железничар и Сараево ќе одиграат неколку дерби натпревари до крајот на сезоната, но Пељто нема да суди на ниту еден од нив.
Тој требаше да биде главен судија викендов на дербито меѓу Железничар и Вележ, но главен судија на „Грбавица“ ќе биде Елведин Топузовиќ. .
Пељто гради завидна кариера на меѓународен план и често суди натпревари во Лигата на шампионите. Неодамна судеше на пријателскиот натпревар меѓу Словенија и Португалија, а претходно го судеше и натпреварот Лајпциг- Реал Мадрид.
Речиси е сигурно дека ќе суди на ЕП.