Рускиот претседател, Владимир Путин, изјави дека Кремељ ќе има одговор доколку САД се повлечат од договорот за нуклеарните сили со среден дострел.

„Јасно е дека повлекувањето на САД не може да помине без наш одговор“, рекол Путин, пренесе ТАС.

Во меѓувреме, руските и американските власти ја пофалија заедничката соработка на двете земји во вселената, истакнувајќи дека е силна наспроти политичките тензии.

Директорот на „Роскосмос“, Дмитри Рогозин, и челникот на одделението на НАСА за истражување и операции, Бил Гестенмајер, денеска се сретнаа на конференција во Москва по повод 20-годишницата од Меѓународната вселенска станица.

Романската владејачка Социјалдемократска партија смени шест министри. Лидерот на социјалдемократите, Ливиу Драгнеа, сака да го зајакне управувањето со владата откако беше критикуван поради својот стил на владеење и поради корупција, пренесе АП.

За време на состанокот, партијата гласала за смена на министрите за сообраќај, економија, труд, култура, развој, спорт и комуникации.

Сојузничката на Драгнеа, Олгута Василеску, која била министерка за труд, сега е министерка за сообраќај, а другите сменети министри останале без функција. Министерот за одбрана, Михаи Фифор, претходно денеска поднесе оставка.

Покрај неа, оставка поднела и градоначалничката на Букурешт, Габриела Фиреа, која го обвини Драгнеа дека ја сака партијата на произволен начин.

Виорика Данчила стана премиерка во јануари, но со мали извршни овластувања, додека всушност владата ја води Драгнеа, кој не може официјално да биде премиер поради обвинувања за кражба на гласови.

Администрацијата на американскиот претседател Доналд Трамп повторно се закани со укинување на акредитацијата за известување од Белата куќа на новинарот на Си-ен-ен, Џим Акоста.

Откако Федералниот судија во петокот нареди да му биде привремено вратена акредитацијата на Акоста, Белата куќа му испрати писмо на новинарот на Си-ен-ен, во кое наведува дека донеле прелиминарна одлука да му се укине акредитацијата, кога ќе истече судиската наредба, пренесе АП.

Белата куќа тврди дека Акоста не ги испочитувал основните стандарди на неодамнешната прес-конференција за новинари, на која изби расправија меѓу него и Трамп и поради тоа му се укинува акредитацијата.

Минатата недела судијата донесе одлука од ограничена природа, со која на Акоста привремено му се враќа акредитацијата.

Во меѓувреме, Си-ен-ен ја тужеше американската администрација поради кршење на првиот и петиот амандман од Уставот на САД.