Федерална судијка од Окружниот суд во Вашингтон го блокираше извршувањето на смртна казна над обвинетиот Весли Пурки.

Доколку егзекуцијата беше извршена, тоа ќе беше втора смртна казна изречена на сојузно ниво во рок од само два дена во последните 17 години.

Министерството за правда на САД имаше намера да го погуби Весли Пурки, осуден за силување и убиство на 16-годишно девојче, денес, и покрај забелешките на неговите адвокати дека Пурки има деменција и повеќе не е во можност да ја разбере казната изречена за него.

Претходно во текот на денот, судијката од Окружниот суд во Вашингтон, Тања Чуткан издаде две наредби со кои се дозволуваат разни правни исклучоци за неколкумина од 61 лице осудени на смртна казна.

Едната наредба се однесува на Пурки, а другата ја спречува федералната влада да погуби уште двајца други мажи осудени за убиство на деца – Дастин Хонкен, кој требаше да биде егзекутиран во петок и Кит Нилсон, чија смртна казна беше закажана за 28 август.

Чуткан посочи дека аргументот на осудените мажи, дека употребата на пентобарбитал во смртоносните инјекции го крши Законот за храна, лекови и козметика, односно надтежнува над тврдењата на Министерството за правда дека законите за безбедност на лековите не важат за вакви случаи, пренесува агенцијата „Ројтерс“.

Ова е трет пат како Чуткан издава наредба со која се одложуваат егзекуции. Првата ваква наредба беше одбиена од Апелациониот суд во април, а втората од страна на Врховниот суд вчера.

Два руски центра за медицински истражувања ја завршија првата фаза од тестирањето на вакцината против Ковид-19.

Две групи од 18 доброволци се отпуштени од болница откако одделно учествуваа на 28-дневни клинички испитувања на Првиот московски државен медицински универзитет и Главната воена клиничка болница „Бурденко“.

Пред да бидат отпуштени од болница, пациентите биле подложени на лекарски преглед и им бил извршен тест на крвта со цел да се утврди развојот на имунолошкиот одговор на новиот коронавирус. Прелиминарните наоди покажуваат дека вакцините се безбедни и дека пациентите добро ги поднеле, немало поплаки, компликации или несакани ефекти за време на испитувањата.

Премиерот на Република Српска, Радован Вишковиќ, е позитивен на тестот на коронавирус, објави неговиот кабинет.

„Вишковиќ беше тестиран во Универзитетскиот клинички центар на Република Српска. Понатамошната работа на кабинетот на премиерот и членовите на владата ќе биде организирана според препораките на Институтот за јавно здравје на Република Српска и епидемиолошките служби“, соопшти Владата.

Исто така, сите претходно планирани активности и состаноци на премиерот Вишковиќ ќе бидат откажани. Неговиот федерален колега Фадил Новалиќ оваа недела беше тестиран на коровавирус и резултатот беше позитивен, а тој денес беше хоспитализиран поради влошување на неговата состојба, односно појава на пневмонија.