Британскиот премиер Кир Стармер се соочува со силен политички притисок поради одлуката во 2024 година да го именува ветеранот на Лабуристичката партија, Питер Манделсон, за амбасадор на Обединетото Кралство во САД, откако станаа извесни неговите врски со Џефри Епстин.

Контроверзијата дополнително се засили по објавувањето на милиони страници документи од американското Министерство за правда, кои укажуваат на блиски односи меѓу Манделсон и Епстин. Манделсон веќе беше сменет во септември, откако беа објавени мејлови што покажаа дека го одржувал пријателството со Епстин и по неговата осуда во 2008 година за сексуални кривични дела.

Лидерот на лабуристите во Шкотска, Анас Сарвар, побара оставка од Стармер, со што притисокот врз премиерот дополнително се зголеми.

Иако Стармер лично не го познавал Епстин, неговата проценка за именувањето на Манделсон е под сериозна критика. Документите наводно покажуваат дека Манделсон споделувал чувствителни информации со Епстин по финансиската криза во 2008 година, како и уплати во износ од 75.000 долари во 2003 и 2004 година поврзани со негови сметки.

Доколку Стармер поднесе оставка, како можни наследници се споменуваат министерот за здравство Вес Стритинг, поранешната заменик-премиерка Анџела Рејнер и градоначалникот на Манчестер, Енди Барнам.

Стармер се обидува да ја консолидира поддршката во партијата, но дополнителен ризик може да претставува објавувањето на британските досиеја поврзани со проверката при именувањето на Манделсон. Доколку тие не ја разјаснат ситуацијата, позицијата на премиерот би можела дополнително да се разниша.

Претседателот на Србија, Александар Вучиќ, изјави дека одлуката дали ќе биде кандидат за премиер треба да биде негова, како и одлука на народот кој, како што нагласи, сака промени што гарантираат стабилност и сигурност, а не хаос и промени какви што, според него, наметнуваат блокадерите.

Вучиќ ги замоли сопартијците да не зборуваат за тоа дали тој ќе биде кандидат за премиер на претстојните избори и да не шпекулираат на таа тема.

„Не е ни време ни место. Прво, тоа мора да биде моја одлука – дали се чувствувам доволно способен и дали го сакам тоа, а потоа мора да биде одлука на народот. А народот сака промени, само не сака промени какви што му наметнуваат блокадерите, туку промени што гарантираат стабилност и сигурност, а не хаос“, изјави Вучиќ во Претседателството на Србија, одговарајќи на новинарско прашање дали ќе се знае дали тој ќе биде кандидат за премиер на парламентарните избори.

Вучиќ рече дека е тешко да не се посака промена на некој што, како што наведе, е 14 години на власт, и дека тука не мисли само на политичките неистомисленици, туку и на оние што го поддржуваат.

„Мене ми останува само да кажам колку грешев и колку работи пропуштив да направам. Секој ден се каам што понекогаш сум се опуштил и можеби не сум работел онолку колку што требаше за да постигнеме уште подобри резултати“, рече Вучиќ, пренесе „Телеграф“.

Тој оцени дека на следните избори ќе победи оној што ќе ги убеди граѓаните дека е способен истовремено да донесе и стабилност и промени.

„Што се однесува до премиерот, ги молам сите луѓе да не зборуваат за тоа. Едноставно е, во овој момент не сакам да кажам не, затоа што секогаш оставам некаква можност“, изјави Вучиќ.

Тој наведе дека има илјада забелешки на сопствена сметка, но дека се постигнати резултати кои денес се земаат здраво за готово и повеќе не се ценат затоа што луѓето се навикнале на нив.

Истакна дека за првпат во историјата Србија има стабилен курс на динарот, а дека поранешниот гувернер на Народната банка на Србија, Дејан Шошкиќ, кој се споменува како име на студентско-блокадерската листа, го уништил динарот и му ја намалил вредноста за 50 отсто.

Вучиќ додаде дека денес Србија има и најниска стапка на јавен долг во однос на бруто-домашниот производ во модерната историја.

Шефот за комуникации на премиерот Кир Стармер, Тим Алан, денес поднесе оставка, велејќи дека тоа го отвора патот за нов тим кој ќе го поддржи британскиот лидер, кој е критикуван поради неговата одлука да го назначи Питер Манделсон за амбасадор во Соединетите Американски Држави.

Заминувањето на Алан доаѓа само еден ден откако најблискиот помошник на Стармер, Морган МекСвини, поднесе оставка од функцијата шеф на кабинетот, велејќи дека ја презема одговорноста да му препорача на премиерот да го назначи Манделсон, чии блиски врски со покојниот сексуален престапник Џефри Епстин ја доведоа во прашање проценката и способноста на Стармер да владее, пишуваат медиумите.

Стармер им се обрати на вработените во неговата канцеларија на Даунинг стрит, повикувајќи ги да останат обединети. „Мора да докажеме дека политиката може да биде силата на доброто“, им рече тој.

„Верувам дека може. Верувам дека е. Ајде да продолжиме понатаму. Ајде да продолжиме со доверба додека продолжуваме да ја менуваме земјата.“

Британскиот премиер продолжува со својата работа и нема намера да се повлече, изјави неговиот портпарол кога беше прашан дали Стармер има намера да поднесе оставка поради случајот Манделсон.

Лидерот на опозициската Конзервативна партија, Кеми Баденох, го обвини Стармер дека е неспособен да ја води својата влада.

„Тој е како пластична кеса што се разнесува на ветерот. Треба да се собере и ако не може да го направи тоа, тогаш некој друг во Лабуристичката партија треба да го стори тоа или треба да имаме избори“, изјави Баденох за „Скај њуз“.