Висок претставник на администрацијата на американскиот претседател, Доналд Трамп, во телефонски разговор со новинари откри детали за напредокот на преговорите со Иран, според кои Техеран се обврзува на неопределено време да се откаже од нуклеарно оружје.

Според информациите објавени од „Скај њуз“, ирански функционери блиски до врховниот лидер се задоволни од текот на преговорите. Сепак, американскиот претставник не потврдил дали ајатолахот дал конечна согласност за договорот.

И покрај тоа што остануваат отворени прашања, претставникот изјавил дека постои 85-процентна веројатност договорот да биде потпишан, иако местото на потпишување сè уште не е утврдено.

Тој изразил уверување дека на договорот ќе му се приклучи и Израел, и покрај неговите тековни напади врз Либан. Иран претходно го постави прекинот на тие напади како услов за постигнување договор.

Во однос на иранската нуклеарна програма, американскиот претставник изјавил дека Иран се обврзува на неопределено време да не произведува и да не набавува нуклеарно оружје.

Обврската, според него, вклучува демонтирање на програмата за нуклеарно оружје и ставање надвор од употреба на нуклеарните постројки.

Тој додал дека Иран се согласил да го уништи и отстрани целиот збогатен нуклеарен материјал, но ќе биде потребно дополнително време за да се разработи начинот на кој ова ќе биде спроведено.

Рускиот претседател, Владимир Путин, изјави дека Русија развива сателитски систем за управување со борбени дронови, за време на состанок со воени претставници.

Воедно, Путин потпиша указ со кој бројот на руските вооружени сили се утврдува на 2.399.130 лица, од кои 1.510.000 се активен воен персонал.

Тој денеска најави и засилување на нападите врз украинската инфраструктура како одговор на украинските удари на руска територија. Според него, Москва мора соодветно да одговори и ќе продолжи да ги интензивира нападите врз цели што ги смета за клучна инфраструктура.

Путин оцени дека руската економија успешно се опоравува и покрај штетите од украинските напади и изјави дека во зоната на, како што ја нарекува Москва, специјалната воена операција се распоредени повеќе од 700.000 руски војници. Тој призна дека напредокот на руските сили не е толку брз колку што очекува Кремљ, но додаде дека Русија чекор по чекор ги враќа своите територии под контрола.

Премиерот на Пакистан, Шехбаз Шариф, денеска објави дека е постигнат „конечен, усогласен текст на мировен договор“ меѓу САД и Иран.

„Среде интензивните посреднички напори на Пакистан, целосно сме свесни за континуираната кампања на дезинформации што ја водат оние кои сакаат да го саботираат мировниот договор. Но, оставајќи го тоа настрана, можеме да потврдиме дека е постигнат конечен, усогласен текст на мировниот договор“, напиша Шариф на социјалната мрежа Икс.

Amid ongoing intense mediation efforts by Pakistan, we are fully aware of incessant misinformation campaign being waged by those who want to sabotage the peace deal. Setting aside the noise, we can confirm that a final, agreed upon text of the peace deal has been reached and…

— Shehbaz Sharif (@CMShehbaz) June 12, 2026

Тој додаде дека Пакистан тесно соработува со двете страни за да ги финализира следните чекори.

„Мирот никогаш не бил поблиску од сега“, порача пакистанскиот премиер.

Според информациите на „Ројтерс“, повикувајќи се на западни извори, договорот за завршување на Заливската војна меѓу САД и Иран би можел да биде потпишан во недела.

Американскиот претседател Доналд Трамп во четвртокот соопшти дека ги прекинува новите напади врз Иран бидејќи е постигнат договор.

„Штотуку постигнавме одличен договор за завршување на војната со Иран“, им изјави Трамп на новинарите во Белата куќа.

Ирански функционер денеска за Ројтерс изјави дека нацрт-договорот предвидува укинување на санкциите за иранската нафта, одмрзнување имот вреден милијарди долари и прекин на сите непријателства на терен, вклучително и во Либан.

Нуклеарното прашање засега е оставено настрана, додека Вашингтон сака преку договорот да обезбеди гаранции дека Иран никогаш нема да развие нуклеарно оружје, нешто што Техеран тврди дека и онака не му е намера.