Во Велика Британија, се откриени нови случаи на заразени со Ковид-19 и тоа како што велат научниците со потенцијално нова загрижувачка мутација, која за прв пат беше откриена во Индија.

До 14 април, властите забележаа вкупно 77 случаи на овој вид на коронавирус, позната како Б.1.617. Од нив, 73 се евидентирани во Англија и четири во Шкотска.

Видот Б.1.617 во моментов е означен како „под истрага“. Ако се покаже дека е позаразен или поотпорен на нашиот имунолошки одговор, тогаш ќе зборуваме за „загрижувачка мутација“, велат експертите.

Постојат неколку „загрижувачки соеви“ во Велика Британија, вклучувајќи ги и оние што први беа откриени во Кент, Јужна Африка и Бразил, пишува Гардијан.

Овие нови видови на коронавирус содржат различен сет на мутации, иако има некои преклопувања.

На пример, сите три соеви имаат мутација наречена „N501Y“, за која се верува дека го прави вирусот позаразен, додека верзиите од Бразил и Јужна Африка имаат мутација наречена 484K, за која се верува дека му помага на вирусот барем делумно да го избегне нашиот имунолошки одговор.

Варијантата Б.1.617 најпрво била откриена во Индија, но подоцна се проширила и на други делови од светот, вклучувајќи ја и Калифорнија. Експертите се малку загрижени затоа што оваа верзија содржи две мутации на S протеинот што може да ја зајакне неговата способност да избегне имунолошки одговор на нашето тело.

Д-р Пол Хантер од Универзитетот во Источна Англија рече дека тоа е потенцијално вознемирувачка верзија.

„Овие две мутации заедно можат да бидат многу попроблематични од јужноафриканските и бразилските соеви кои имаат само една таква мутација, а потеклото од Индија полесно може да навлезе во заштитата на вакцините“, рече Хантер.

Сепак, потребни се дополнителни истражувања за да се утврди точната улога на овие мутации и нивното влијание.

Работниците на римските гробишта протестираа затоа што, како што велaт, повеќе не можат да се справат со пренатрупаните мртовечници, обвинувајќи ја владата дека не е во состојба да управува со пандемија на коронавирус.

Директорите на гробиштата велат дека 2.000 тела се натрупани само во римскиот крематориум, со капацитет од 50 лица на ден и дека другите гробишта се преполни.

Градската компанија за погреби претходно оваа недела објави дека се соочува со невидена ситуација и дава сè од себе за да обезбеди дополнителни 60.000 гробни места.

Според компанијата, од октомври 2020 до март 2021 година имало 4763 смртни случаи повеќе отколку во истиот период 2019/2020 година, а негативниот тренд продолжил и во април.

Досега, 116.000 луѓе починаа од Ковид-19 во Италија. Повеќето од нив се наоѓаат на северот на земјата, но во последно време сè повеќе луѓе умираат во централна и јужна Италија.

Демонстрантите положија венци пред Храмот Херкул, во близина на Градското собрание.

Политичарите од опозицијата велат дека таквата ситуација можела да се избегне доколку градските власти ги слушале предупредувањата уште во 2017 година дека треба да се модернизира и прошири крематориумот.

Германската канцеларка Ангела Меркел денес беше вакцинирана со „астразенека“.

Меркел, која во јули ќе наполни 67 години, веќе објави дека има намера да се вакцинира, но дека го чека својот ред, пишува „Дојче веле“.

Досега претседателот Франк-Валтер Штајнмаер исто така беше вакциниран со „астразенека“, велејќи дека има доверба во вакцините што биле одобрени во Германија.

По препорака на Централната комисија за вакцини во Германија, само оние над 60 години се вакцинираат со „астразенека“ од почетокот на април.

Министрите за здравство на сојузните покраини пред неколку дена одлучија помладите луѓе кои ја примија вакцината на „Астразенека“ како прва вакцина, да добијат вакцина од „Фајзер / Бионтек“ или од „Модерна“ во втора фаза.