Руското Министерство за надворешни работи прогласи пет лица вработени во полската амбасада за персона нон грата, наведувајќи дека треба да ја напуштат Русија до 15 мај, пренесуваат руските агенции.

Во соопштението се вели дека станува збор за реципрочен одговор на потегот на Варшава, којa на 15 април прогласи тројца претставници на руската амбасада за непожелни, повикувајќи се на наводнo кршење на правилата за дипломатски статус и активности на штета на Полска.

Полскиот амбасадор, кој денес беше поканет во руското Министерство за надворешни работи, беше информиран за одлуката на Москва.

Папата Франциско предупреди дека светот е на патот на самоуништување доколку политичките лидери не успеат храбро да ја искористат пандемијата на Ковид-19 како шанса да ја направат планетата поправедна и позелена.

Во видеопорака објавена на Светскиот ден на планетата Земја, папата Франциско рече дека политичките лидери имаат можност подобро да излезат од оваа ситуација по научените лекции за социјалните неправди откриени за време на пандемијата, пренесува АП.

„И глобалните катастрофи, ковидот и климата, покажуваат дека немаме време за губење. Времето нè притиска и, како што покажа Ковид-19, имаме средства да одговориме на предизвикот. Имаме средства. Време е за дејствување, ние сме на граница“, рече папата.

Тој додаде дека неволите со кои се соочи човештвото во пандемијата треба да ги охрабрат водачите да се стремат кон иновации и пронајдоци со цел подобро да ја заштитат планетата.

Тој апелираше до сите водачи на светот: да постапуваат смело, да дејствуваат чесно и секогаш да им ја кажуваат вистината на луѓето, за луѓето да знаат како да се заштитат од уништување на планетата и како да ја заштитат планетата од уништување што е иницирано многу пати.

Излезот од пандемијата на Ковид-19 е масовна вакцинација, изјави денеска романскиот претседател Клаус Јоханис, додавајќи дека ограничувачките мерки постепено ќе се укинуваат кога бројот на заболени од коронавирус ќе почне да опаѓа и кога ќе се намали бројот на хоспитализирани и починати пациенти.

„Без вакцинација не можеме да излеземе од пандемијата, тоа е многу јасно. И патот надвор од пандемијата води преку масовна вакцинација. Јас сум вклучен во кампањата за вакцинација, ќе продолжам да работам и да ги посетувам центрите за вакцинација, да разговарам со луѓето, ќе давам јавни изјави како денес: ‘Драги Романци, вакцинирајте се’“, рече Јоханис, објави „Аџерпрес“.

Шефот на романската држава смета дека вакцинацијата се одвива со добро темпо, но ограничувачките мерки не можат да бидат укинати преку ноќ.

„Засега можам да кажам дека вакцинацијата се одвива многу добро. Ние вакцинираме 100.000 луѓе на ден. Како што се намалува пандемијата, ако видиме дека паѓаат бројките, мерките постепено ќе се олеснат. За жал, многу луѓе сè уште умираат од коронавирусот“, рече Јоханис.